Ka Sorkar kan nym kynriah iaka OST Centre na Civil Hospital, Shillong, ong ka Myntri

Syllad | The Rising MeghalayaSeptember 25, 2024

Ka Myntri ka Tnad ka Koit ka Khiah la Kong Ampareen Lyngdoh ha ka 24 tarik Nailur ka la pyntip ba ka sorkar Jylla kam don satia ka jingthmu ban pynkynriah ia ka Opioid Substitution Therapy (OST) Centre napoh Shillong Civil Hospital.

Haba kren sha ki lad pathai khubor, ka Myntri ka la ong, “Nga la iamir jingmut slem bha ha kato ka sngi, la pyntip sha nga ba ka la don ka jingdawa ban pynkynriah noh ia ka OST na kane ka jaka, hynrei kaba sngewsih ka long ba ka ain kam shah satia ia ngi ba ngin leh kumta.”

Ka la ong ruh ba ka long kaba donkam ban wad bniah balei ki don kita ki jingduna hapoh ka OST bad ngi donkam ban wad bniah ia ki lad ki lynti ban pynbha ia ka jingtreikam jong kane ka Centre.

“Nga sngewkmen shibun ba ka kynhun Drug Users Association ruh ka la wan shakhmat da kaba phah ruh ia ki volunteer ba kin iatreilang bad ki bor pyniaid jong ka hospital na ka bynta ban pyniaid beit ia kane ka Centre. Wat shu beh ia ki briew bad ban set ia ki ha ki synduk ka ban nangpynjngai na ki lad jingiarap, kata kam dei ka rukom treikam,” ka la ong.

Nalor kata da kaba kyntu ia ka seng HYC ban leh ia kane ka kam ha ka lynti kaba dei, ka Myntri ka la ong ruh, “Ki don ki ain kiba ialam lynti ia ngi. Ngim lah ban treikam shabar ka pud jong ka ain, kumta ki don ha ka jingiasngewthuh jingmut, nga la kyrpad ia ki ba kin wan shakhmat ban iarap ia ka sorkar. Lada phi iohi ba ki don kine ki jingleh pyrshah ia ka imlang sahlang, ha ka jaka ban beh ia ki, to ngin wad ia ka lad ban iarap ia ki, bad kata ka dei tang ka lad kaba ngi hap ban pyniaid namar ym don da kawei pat kad lad kaba la pdiang da ka ain.”

“Kumta sngewbha ai por ia ngi, ngi donkam ban buh ia kata ka Centre ha ka rukom kaba kham bha. Ngi donkam ban pynioh ia ka jingiasyllok ha ka rukom kaba biang. Ngi donkam ban ai ia ki jingdonkam kiba biang khnang ba ngin lah ban bat ia kito kiba la lait noh na ka lnti kaba dei. Ngi hap ban pyrshang ban wanrah pat ia ki sha ka lynti kaba dei khlem da bishar iano iano ruh, khlem da thmu iano iano ruh,” ka la ong da kaba pynthikna ba kane ka sorkar ka sngewkhia jur bad ngin sa wad ia ki lad ki lynti ban pynbeit ia kane ka jingeh baroh kawei.”