Ka Sorkar kan pyniaid shakhmat halor ka jingpyntreikam ia ka NEP, kloi ban iakren bad ka MCTA, ong u CM

Syllad | The Rising MeghalayaSeptember 13, 2023

U Myntri Rangbah ka jylla u Conrad K Sangma haka sngi ba Ar u la ong ba ka sorkar kan pyniaid shakhmat ha kaba iadei bad ka jingpyntreikam ia ka NEP 2020 bad kan ym don satia kano kano ka jingphaidien na kane ka rai.

Haba kren sha ki lad pathai khubor une u Myntri u la ong ba ka sorkar ka long kaba kloi ban pynlong ka jingiakren bad ka ka seng ki nonghikai ka Meghalaya College Teachers’ Association (MCTA) kaba la ieng pyrshah ha kaba iadei bad ka jingpyntreikam ia ka NEP.

“Sa shisien pat Nga pdiang sngewbha ia baroh kiba don ka jingsngewkhia, u Myntri ka Tnat pule puthi u long uba la kloi ban iakynduh bad lada ka long kaba donkam Nga long ruh uba kloi lada phi kwah ia ka jingpynshai,” ong shuh shuh u Conrad Sangma.

Nalor kata u CM u la ong ruh ba u la ioh ban iakren bad kiba bun ki principal ha kaba bun na ki ki la pynpaw ba ki kwah ban pyniaid shakhmat ia ka NEP bad ba na ka liang ka sorkar ka la pynthikna halor ki jingkyrshan kiba ki donkam.

Ha kawei pat ka bynta na ka liang u Myntri Rangbah u la ong ba kam don satia kano kano ka jingbei tyngka kaba wan beit beit na ka sorkar pdeng ha kaba iadei bad ka jingpyntreikam ia ka NEP.

“Ka sorkar pdeng ka la iarap ia ngi ha kiba bun ki bynta, hynrei kam pat shym la don satia kano kano ka jingpynpaw kaba kdew shai na ka liang ka sorkar ha kaba iadei bad ka jingkyrshan pisa na ka bynta ban pyntreikam ia ka NEP,” u la ong.

Na ka liang u CM  u la ong ruh ba ka sorkar pdeng ka la iarap ia baroh ki jylla da kiwei pat ki rukom, kata la ka long ha kaba iadei bad ki jingtei hapoh ki college level, la ka long ha kaba iadei bad ka jingkyrshan halor ki jingai jinghikai bad kiwei pat.

Shuh shuh u CM u la ai ruh ka jingkhublei kaba kyrpang ia ka sorkar India khamtam ia u Myntri ka Tnat pule puthi uba la ai ka jingkyrshan ia ka Meghalaya ha baroh ki sienjam.