Ka sorkar MDA kala ïasaid ban pyllait ïaka jingkhang tih dewiong: Prestone

Syllad | The Rising MeghalayaApril 9, 2019

JOWAI: U Bah Prestone Tynsong Deputy Chief Minister ka Jylla ula ong “ka Sorkar MDA kala ïasaid tyngeh ban pyllait ïaka jingkhang tih dewiong haka jylla, hynrei namar bala poi ka samoi elekshon kala shem shitom ban khyndang bad ban pynkylla ïaki file ha Delhi.”

“Naduh ba sorkar MDA kala ioih ka bor synshar ha Jylla, haduh hynriew sien ma nga bad u Myntri Rangbah ka Jylla u Conrad K Sangma kila leit ban tynruh sha Delhi ban ïakren ban pyllait ïa ka jingkhang tih dewiong na ka Home Ministry bad ka Coal Ministry, hynrei namar ba ka Sorkar MUA hapoh ka jingialam u Dr. Mukul ula phah da ka affidavit ban mynjur ban tih dewiong da ka MMDC, kala soh kyrdot bha ban pyllait ïaka jingtih dewiong haka jylla”, la ong u Bah Prestone haba kren haka jingïalang ban pan jingkyrshan ïa u kyrtong monlang ka sorkar MDA u Dr. Jemino Mawthoh ha Iawmusiang haka sngi Nyngkong.

Ula iathuh ba ula phet na ka Congress namar ba ki heh ka Congress kim khein briew ïaki haba ki leit ban kyrpad kyrpon sha Delhi ban ïoh jingiarap bad kumjuh ruh ka jingleh donbor u Dr. Mukul ha kaba iadei bad ka kam tih dewiong marwei.

Shuh shuh u Ma Lahkmen Rymbui, Myntri ka Pule Puthi, u Bah Lambor Malngiang Chairman State Planning Board, u Ma Nujorki Sungoh kila pan ka jingkyrshan jong u paidbah ban pynjop ïa u kyrtong Monlang ka MDA khnang ban wan ki kam pynroi haka jylla.

Kila ïathuh ba sorkar MDA ha kine shisnem kala ïoh ka jingiarap pisa kaba T.2000 klur tang ka bynta ban shna surok bad lada u kyrtong monlang ka MDA un ioh ka nam jop ka lah ban nang heh shuh shuh ka song pisa kaba ka jylla kan ioh iarap ban kyntiew ïaki kam pynroi.