Ka sorkar MDA kala pynphiel iaka Swachh Bharat Mission: HH Mohrmen

Syllad | The Rising MeghalayaAugust 13, 2021

U Ma HH Mohrmen, uwei na ki nongshong shnong ka Jowai bad u riew pawkhmat uba la synniang da ki jingthoh ha ki kot khubor, haba kren haka jingiakhih pyrshah ka Dorbar Shnong Tympang Iawmusiang haka 10 tarik une u bnai, ula ong ba ka sorkar Meghalaya kala pynphiel iaka Swachh Bharat Mission, kaba ka jingthmu jong ka,ka dei ban wanrah iaka jingkhuid jingsuba.

Kane ka jingphiel ka Swachh Bharat Mission kadei namar ba ka sorkar kala lehklet iaka Jowai, ka ibein iaki nongshong shong ka Jowai.

“Ngan iathuh ia phi ba kane ka shnong ka dei ka shnong kaba la kha ia u Khlawait ka Jylla bad ka shnong kaba sdang ban ialeh pyrshah iaka jinglehdonbor u dohlieh,” la ong u ma Mohrmen.

Ula ong “Ka sorkar kala rai ban rakhe laitluid ba 75 snem bad ngi ruh ngin rakhe iaka sngi Laitluid ha jaka ba phasi ia u Kiang Nangbah ha khmat ki ñiut bad ngin pynher iaka lama lai rong ka ri ha khmat ki ñiut kum ka dak ban pyrshah iaka sorkar.”

“Ngin pynher ia ki lama ha khmat ki ñiut khnang ban iohi ka pyrthei baroh kawei bad ba ka ri baroh ka wei ruh kan iohi kumjuh Prime Minister uba la sdang iaka Swachh Bharat Mission un iohi ba phiel kane ka campaign ban wanrah iaka khuid ka suba ha Jowai ba phiel ka sorkar MDA.”

U Edystone Shylla Waheh Shnong ka Dorbar Shnong Tympang Iawmusiang, ula ong kane ka dei u sur u paidbah bad ka sur jong ka ri Jaintia baroh kawei ban iakhih pyrshah ban pynioh iaka jaka bret ñiut kaba pura.

“Ngi la ap bad iaishah, hynrei ngi la shah ban bein bad ka dorbar shnong Tympang Iawmusiang kala sakhi iaka jingeh wat hadien ka jingpyrshang ban wanrah iaka khuid ka suba, hynrei kane ka jingpyrshang kala theh umpjah noh namar ba phiel ka Urban bad JMB bad ka bor synshar district ban pynkynriah iaki ñiut,”

Kane ka jingiakhih ka dei ka jingsdang bad katba ka sorkar kam lah ban pynkynriah iaki ñiut ka jingiakhih kam pat kut.

U Ma LD Lakiang waheh shnong Ladthadlaboh, haba kren ha kane ka jingialang ula ong ka synjuk waheh shnong kam don kano kano jingpyniapher jaidbynriew, hynrei wat pynlong politik ia kane ka mat namar ba ngi ruh ngi kwah jaka bret ñiut.”

U la ther tyngeh ia Home Minister uba long u MLA ka War Jaintia ma Lahkmen Rymbai ba ula pynksan iaki 6 shnong halor ka jingpyrshah iaka jingtheh ñiut ha Mynkjai bad ula buh jingkylli ba hangno kiba haiing ha sem jong u Lahkmen kiba sah ha Jowai ki bret ñiut.

Kane ka dei ka politik jong u ma Lahkmen bad u klet iaka jingkitkhlieh jong u kum u myntri bad nongmihkhmt ka rulim Jaintia, ula ong ma Lakiang.

“Ngi ruh ngi kwah ban ioh iaka jaka ba pura ban theh ñiut, bad kaei ba ki 6 shnong ki sngewthuh bakla ka dei ka jinglam bakla ki politician,” la ong u Ma Lakiang bad bynrap ba ka rally haka 17 tarik une u bnai kan iaid beit ban iakhun pyrshah iaki ñiut.