Ka Sorkar MDA kan pyndep pura ia ka jingsynshar haduh kaba kut ka samoi: Conrad Sangma
U Myntri Rangbah ka Jylla u Conrad K Sangma ha ka 5 tarik Jylliew u la ong ba ka Sorkar Meghalaya Democratic Alliance (MDA) ba la ialam da ka NPP kan pyndep pura ia ka jingsynsahr haduh kaba kut jong ka samoi ba san snem kynthih.
U Sangma uba dei ruh u National President ka NPP bad Chairman ka MDA, u la khot pynlong ia ka jingialang jong baroh ki paralok synrop hadien ka jingshah rem ha kane ka ilekshon Lok Sabha kaba dang shu dep shen na baroh ki artylli ki constituency ha ka Jylla.
![](https://www.syllad.com/wp-content/uploads/2024/09/JIT-Vacancy-823x1024.avif)
Haba kren sha ki lad pathai khubor u Conrad u la ong ba ka jingbym lah lehbha jong ka NPP ha kane ka ilekshon Lok Sabha ka dei halor bun ki daw. U la ong, “Ka dang kloi palat ba ngan kynthoh ei ei halor kane ka jinglong jingman hynrei ki don shibun ki daw ba ngi la dep ban shong jingialang katto katne sien ban iakren bniah halor kane ka bynta.”
“Ngi la shong jingialang bad baroh ki paralok synrop. Ha ka jingshisha dang mynta ruh ngi dang dep ban pynlong ia ka jingialang bad baroh ki paralok synrop khamtam ka UDP ka la wan ban iakynduh ia nga hynne ka sngi bad iakynduh ruh ia ka BJP ha kaba ngi la iakren halor ki mat bapher bapher bad kumta ruh ngi la ban jur ba ngin pyndep pura ia ka jingsynsahr jong kane ka samoi kaba mynta. Ngin iatreilang ha ka nongrim kaba skhem bad ngin iai bteng ban ai ka jingshakri ia ki paidbah da kaba pynshong nongrim katkum ka rai kaba u paidbah u la ai ha ngi.”
“Ki paidbah ka Jylla ki la ai ia ka rai ha ka ilekshon Assembly bad halor kane ka nongrim la thaw ia ka sorkar, kumta Nga tharai kin hap ban leh ia la ka jong ka kam ba la bynshet ha ki. Ka ilekshon 2023 ka dei na ka bynta ka Assembly bad ki paidbah kila jied bun ia ki seng sain pyrthei kiba don hapoh ka sorkar. Ki la kham pynjop bun ruh na ka kaba ki la ai ha u snem 2018, kumta kane ka dei ka rai kaba la thaw ia ka Sorkar bad ka long kaba bakla shibun ia kino kino ba kin kren halor kane,” bynrap u Conrad.
Haba kylli u CM u la ong, “Khamtam haba iakren halor ki jyrsieh ne scam kane ka kyntien jyrsieh la shu pyndonkam kat haba don da baroh bad kano kano kaba jia, phi tip ki la shu pynkylla beit sha ka jyrsieh. Dang shen ki la don kiba pynpaw halor ka jyrsieh na ka kam jngohkai pyrthei lane ka jyrsieh kaba T.1300 klur, kumta ka long kaba suk bha ban pyndonkam ia ka kyntien jyrsieh. Hynrei haduh mynta yn don satia kawei ruh na kine ki jingkynnoh kiba don nongrim bad ia kiba la lap lyngba ka jingtohkit, bad ym shym la don napdeng kine ki jingkynnoh kiba don ia kano kano ka nongrim.” “Kumta ka long kaba suk shibun ia ki briew ba kin kdew kti, hynrei ki don ban don ia ki jingshisha bad kumjuh ia ki jingkhein jingdiah. Hooid ka long kaba sngew bynniaw shibun halor kiba kum kine ki jingkynnoh ki bym don nongrim bad ba na ka liang ka sorkar ngi ju pynthikna halor ka jingtreikam kaba khuid, bad la ka long ha kano kano ka rukom ruh, ngim don ei ei ruh ban buhrieh,” ong shuh shuh u CM.
Leave a Reply