Ka Sorkar Pdeng ka la phah pynphai ia ka 200 klur ba thmu thied jaka lynti rel ha Meghalaya: CM Conrad

Syllad | The Rising MeghalayaMarch 4, 2025

U Myntri Rangbah ka Jylla u Conrad K Sangma haka 4 tarik Lber u la pyntip hapoh ka iingdorbar ba ka Sorkar Pdeng ka la bthah ias ka sorkar Jylla ba kan pynphai noh ia ka pisa kaba kot T.200 klur ia kaba la mang ban jied jaka na ka bynta ban pyntreikam ia ka project lynti rel ha Meghalaya.

“Ngim pat shim iaka jaka namar ka jingpyrshah kaba jur ia ka jingwan ka lynti rel. Ngi la ioh pdiang ia ka shithi na ka Northeast Frontier Railway (NFR) ha ka 17 tarik Nohprah 2024 kaba la kyntu ia ngi ba ngin hap ban pynphai noh ia ka pisa namar ym shym la pyntreikam ia ka mynta la 7-8 snem,” ong u Conrad ha ka kynta buh jingkylli.

“Namar ka dei ka kam kaba khia shibun bad kaba kynrum kynram kumta ruh ka sorkar kam shym la pyniaid shakhmat ha kaba iadei bad ka jingthied jaka. Namar ka jingpynslem, ka Sorkar India mynta ka la bthah ia ngi ba ngin pynphai noh ia kane ka pisa,” u la ong.

Halor ka jingkylli la kane ka project ka dei na ka bynta ki rel kit briew ne kit mar, u Conrad u la pyntip ba ka sorkar ka la iakren ha kiba bun ki rynsan bad halor ka nongrim, hynrei ka la don ka jingpyrshah kaba jur ia kane ka jingtyrwa ban pyntrei ia ki lynti rel, kumta ngim shym la lah satia ban pyniaid shakhmat.

U CM u la kular ruh ba ka sorkar kan sa iasyllok bad baroh ki kynhun bapher bapher hashwa ban shim ia ka rai ban pyntreikam ia kiba kum kine ki project kiba kongsan.

“Nga la iakynduh ruh ia u Myntri ba dei khmih ha kiba bun ki khep, bad ha ka jingiakynduh kaba khatduh eh, nga la ai ksai ia u Myntri ba ngin ym lah satia ban pyniaid shakhmat ia ka project namar ka jingpyrshah kaba jur ban pyntrei ia ki lynti rel,” u la ong.

Haba pynpaw halor ka jingkongsan jong ki lynti rel, u CM u la ong, “Kum ka sorkar ngi sngew ba ka long kaba donkam bha ia ka lynti rel haba khmih halor ka roi ka par lyngba ka jingpynkit ia ki mar ki mata namar ka pynsuk shibun ha ka liang ka kit ka bha ia ki mar na ka jylla bad na shabar ka jylla kumjuh.”

U MLA ka North Shillong u Bah Adelbert Nongrum u la pynpaw ia ka jingsngew ba ka lah ban don ka jingiakren ba sop sop kaba lam sha ka jingmang pisa kaba T. 200 klur jong ka Sorkar Pdeng sha ka jylla.

Haba pynphai halor kane, u CM u la ong ba kam shym la don satia kano kano ka jingiakren sop sop namar kane ka pisa ka dei beit thik tang ha kaba iadei bad ka jingthied jaka.

Kham hashwa, u Symbud Myntri Rangbah uba khmih ia ka Tnad Transport u Bah Sniawbhalang Dhar u pyntip ba ia kane ka pisa T.200 klur la mang naduh ka 30 tarik u Lber 2017.

“Hynrei ym shym la lah ban pyndonkam namar ka jingpyrshah kaba jur na ki trai shnong bad namar ka jingbym ioh jaka.Kumjuh ruh ngim shym la ioh ia kano kano ka No-objection certificate na ka district council,” u la ong haba kdew ia ka daw ka jingsahkut jong kane ka project haduh kine ki sngi.