Ka Special Job Card ka hok kiba duna ki dkhot met: BDO Thadlaskein

Syllad | The Rising MeghalayaApril 8, 2025

U Block Development Officer jong ka Thadlaskein C&RD Block u Dr Heimonmi Niang ula ong baroh ki nongshong shnong kiba don iaki jingduna haka bor met ki don ka hok ban ioh iaka hok kaba kyrpang ban bylla sngi lyngba ka Special Job card hala ki shnong ki jong ki..

Ula ong ia kane haba pynshai iaka jingialang kaba lyngkot kaba long haka 8 tarik Iaiong ha ophis treikam jong u ha kaba la iadonlang ruh ki briew kiba don ka jingduna ha ki dkhot met.

Ula ong ba baroh ki nongshong shnong kiba don ka jingduna ha ki dkhot met, ki don ka hok ban ioh ia ka job card kaba kyrpang (special job card). Ka longing kaba don ia ki dkhot kiba kum kine nalor ka job card kaba kawei pa kawei ka longing ka dei ban ioh, kito kiba don ka jingduna ha ki dkhot met, ki dei ban ioh ia ka job card kaba kyrpang.

U Dr Niang ula ong ba kane ka dei ka hok jong ki bad u kyntu ia ki secretary VEC kumjuh ruh ki nongtrei jong ba block ba kim dei ban pynduh ia ka hok kaba ki dei ban ioh. U Dr Niang ula kyrpad ruh ia kine ki paralok kiba don ka jingduna ha ka dkhot met kiba shong ba sah hapoh ka Thadlasein Block ba kin kynjoh ktien ia u lada ki don kano kano ka jingdonkam.

Ka kong Ripnar Shylla kaba long ka APO jong ka Thadalskein Block kala pynshai ia kine ki nongshong shnong kiba ba don jingduna ha ki dkhot met, ba ki dei ban iakynduh ia ki Secretary VEC jong ki bad bad ban pynbiang ia ki kot ki sla kum ka EPIC, ka Aadhaar, ka dur passport bad kiwei kwei khnang ba yn lah ban pynioh ia ka job card kaba ki dei ban ioh.

Kala ong ruh ba ha kine ki sngi kiba la dep, naka liang jong ka ophis jong u BDO Thadlaskein kila lah ban aiti ia ki job card sha ki katto katne ki nongshong shnong jong ka block kiba don ka jingduna ha bor iohi.

U Dr HH Mohrmen uba long u Secretary jong ka SURE ka seng treimon sngewbha ula pynpaw ka jingsngewnguh ia u BDO bad ka APO na ka bynta ka jingtrei shitom jong ki. La ioh ruh ia ka jingkren jong u Krishna Phawa na Mihmyntdu bad ka Heiioobitmi Tre Dhar na Wahiajer kiba don ka jingduna ha ka bor iohi.