Ka State Anthem kan ym long kaba pura khlem ka Jaintia: JNC

Syllad | The Rising MeghalayaJanuary 24, 2024

Ka Jaiñtia National Council (JNC) ha u kyrwoh na u president rangbah Bah Sambormi Lyngdoh kala pynpaw iaka jingbym sngew iahap bad ka jingong u Myntri rangbah u Conrad Sangma halor ka state anthem ba ka sorkar kam thep lang iaka ktien na Jaiñtia kadei ba katkum ki kyndon ka aiñ. U bah Sambormi Lyngdoh u ong ba ka jingdawa jong ngi ban kynthup lang iaka Jaiñtia haka anthem kam dei tang namar ka ktien, hynrei ka dei shwa nyngkong iala ka riti ka dustur jong ka Ri Jaiñtia, ka Jaiñtia kaba lah don laka histori naduh ki spah spah snem bad ka culture hangne ruh ka long kaba riewspah bad pher bha hynrei ka sorkar kalah leh klet pat. 

Ula pynpaw ba ka jingdawa jong ngi ban kynthup lang iaka Jaiñtia haka anthem ka long ruh kum shi bynta ban pynshong nongrim kadei halor ki lai tylli ki major tribes (Khasi, Jaiñtia bad Garo) lada ka English ka ioh rung kum kata ka official language balei iaka Jaiñtia pat kaba lah don laka histori ba wat hashwa ba u phareng un wan iuhkjat hangne ha Ri jong ngi ruh ka Jaiñtia kalah don lypa ryngkat ka niam bad ki riti ki dustur kiba lah hikai naduh ki mynbarim. Ka Jaiñtia kaba lah don ia u Khlawait u Woh Kiang Nangbah uba ialeh naka bynta ka Ri hato ka sorkar kamut ban lyndet iaka Jaiñtia? Ka constitution ka Ri India haka Article 29 kala kren shai ba kano kano ka tribes ka don iaka hok ban iada bad ban pynneh pynsah iala ka ktien ka riti bad balei ba u myntri rangbah u ong pat katkum ka aiñ? Ka aiñ ba aiu kum kata kaba thmu ban pynduh iaka hok ka Ri Jaiñtia kaba dei kawei naki major tribes Jong ka jylla, haba peit iakane wat iaka reservation policy ruh imat ka sorkar ka mut ban pynduh iaka kyntien Jaiñtia hynrei long katba long ka seng kam nym ailad ban nym pdiang hi ruh ia kum kane ka jingthmu. Ka seng ka sngew ban pynpaw ruh haba haki jingthoh lah thoh ba ka Meghalaya kadon lai ki riewlum te balei hap ban pynduh bad pynjah noh iakawei? Ka sorkar kahap ban pynshai bad jubab iakane.

Ka seng JNC ka kyntu jur ruh iaki 7 ngut ki MLA bad 30 ngut ki MDC ba kim dei ban shu sngap jar hynrei ki dei ban kren halor kane ba dalei lei ruh ka Jaiñtia kam dei ban jah namar kane kalah ban pynsngewsih shi katdei eh iaki nong Jaiñtia. Lai ngut ki minister haka Cabinet ka la biang eh ba kin leh eiei halor kane ka bynta. Ka seng ka pyrshah jur iaka ktien nongwei haka jaka kaba lah don lypa bad iakane ka seng ka kwah ruh ba u minister badei peit iaka Arts and Culture u dei ban leh iaka ba donkam bad ban ai lang ia baroh lai ki riewlum ban kaba shu pynksan iakata ka ktien nongwei.

Na kaliang JNC ula ong iaka Meghalaya State Anthem hi kan nym long kaba pura (complete) khlem ka Jaiñtia namar wat iaka Meghalaya ruh lah pynwandur daki lai riewlum kata ka Khasi Jaiñtia bad ka Garo te kumno haka anthem pat khlem ka Jaiñtia bad ki nong Jaiñtia ruh Kim lah ban pdiang iakane ka jingklet ka sorkar iaka Ri lum Jaiñtia.