Ka Supercare ka hospital kaba nyngkong eh ha Meghalaya ban ioh iaka jingithuh haka jingsumar ba kyrkieh

Syllad | The Rising MeghalayaFebruary 6, 2023

Ka Supercare Hospital kan kylla long kaba nyngkong eh bad tang maka na ki jaka sumar ha Meghalaya ban ioh iaka jingithuh bad ka jingsumar ba kyrkieh ne Emergency na ka National Accreditation Board for Hospitals and Healthcare Providers (NABH).

“Ka NABH kadei iaki jingai jingshakri ki hospital kala ithuh iaka Emergency Department ne kam ai jingsumar ba kyrkieh jong ka Supercare Hospital, Shillong bad ka lap ruh ba kane ka hospital ka bud ia ki kyndon jong ka NABH ha kaba iadei bad ka Emergency Department ha ki Hospital ha India,” la ong ki bor pyniaid jong ka Supercare Hospital.

Ka NABH ka dei ka shnat ba khmih bad ai kyrdan ia ki hospital ha India. Ka dei ka bynta jong ka Quality Council of India (QCI), kaba kyntiew ia kiba bun ki liang ha ka ri. Ka accreditation program ka NABH ka buh ia ki kyndon na ka bynta ki lad sumar ha India, kynthup ia ka emergency ne ka jingai jingiarap ba kyrkieh khnang ban pynthikna ba ki ai jingsumar babha bad ba shngain. 

Ia kine ki kyndon la pynshong nongrim halor ki rukom sumar babha tam ha ka pyrthei bad la pynwandur ban buh jingshngain ia ki nongpang ha ki hospital. Ki kyndon ka NABH mynta ki dei kiba bha tam bad ba wan shakhmat na ka bynta ki hospital ha India. Lada ka hospital kala ioh kyrdan jingithuh na ka NABH, la shim ba ka dei ka jaka sumar babha bad ka ioh jingithuh ha kylleng ka pyrthei. 

Ka Standards for Emergency Certification ka pynwandur ia ka rukom sumar babha bad ka jingshngain ia ki nongpang ba don ha ka Emergency Department. Kine ki kyndon ki iarap ia kata ka jaka sumar ban iai pynbha ia ka rukom sumar. Ki thmu ban buh ia ki jingkhmihlynti na ka bynta ban ai jingiarap ba kyrkieh kaba long kaba bha bad ba shngain, bad da kumne ki jingmih na ka jingsumar kin long kiba bha tam. 

Hadien ka jingkhmih bniah ia ki 44 tylli ki kyndon la ki treikam hok ne em ba kynthup ia ki 255 tylli ki jingbuh thong ne ki objective element, ka Supercare Hospital kala ioh ia kane ka jingithuh, bad kane ka pynlong ia ka ka hospital ba nyngkong bad tang ma ka hi ha Meghalaya ban ioh jingithuh na ka NABH ha kaba iadei bad ka Emergency Department.

Ka Emergency Department iong ka Supercare Hsopital ka don baroh lang 10 tylli ki jingthiah kiba la biang ïa ki tiar ban khmih ïa ki nongpang, ki tiar leh test ba don hajan ki nongpang, ki laiñ ai ba wan na ka tyllong, ki dawai ba donkam, bad kiwei ki tiar ba donkam ban ai jingsumar ba paka ia ki nongpang. Ka Emergency Department ka kynthup ruh ïa 2 tylli ki jingthiah ba don ventilator ban lah ban leh eiei haba donkam ïa ka jingsumar ba kyrkieh bad ba shitom jur.

Ka Supercare kala ioh ia ka jingithuh na ka NABH na ka bynta ka Emergency Department ha ka 15 tarik u Nohprah 2022. Kane ka jingithuh kan treikam haduh ka 14 tarik u Nohprah 2024.

Kane ka jingithuh kan pynthikna bala bud ryntih ia ki kyndon ha ka Emergency Department, ha kaba ia ki nongpang la sumar da ki nongtrei bala ioh jinghikai pyntbit. Kane kan iarap ruh ban kyntiew ia ka rukom treikam ha baroh ki liang jong kiba trei ha ki clinic bad ki paramedical staff ba don bynta ha ka Emergency Department.

Ka Supercare Hospital, Shillong, ka dei ka hospital ba ar ha ka thain shatei lam mihngi baroh kawei ban ioh ia kane ka kyrdan. 

U nongseng bad Managing Director, u Dr Rangksan Singh Thangkhiew u la ong, “Kala ju long ka jingthrang jong nga na ka bynta kane ka jaka sumar ba kan long kaba hakhmat ha ka thain ha kaba iadei bad ka jingai ia ka jingsumar ba paka. Ngi la pyni ia ka jingaiti lut haba ngi la long ka hospital ba nyngkong ha Meghalaya ban ioh jingithuh ba pura na ka NABH ha u Nailur 2022 bad kane kawei pat ka jingithuh na ka bynta ka Emergency Department ka dei sa kawei ka jingjop ia ngi. Kane ka pynskhem ia ka jingaiti jong ngi ban ai jingsumar babha, ba shngain, ba tbit bad ngin bteng ban pynkhih ialade ban ai ia kaba bha tam sha ka imlang sahlang.”