Ka Supreme Court kan shong bishar iaka kam khajia pud ha u bnai Nailar ong u Erwin

Syllad | The Rising MeghalayaJuly 23, 2023

U Ma Erwin K Sutnga haka sngi Saitjain ula ong ba ka Supreme Court kala buh tarik ba hadien ka 20 tarik u bnai u Nailar kan shong bishar halor ka mukotduma jong ki halor ka jingpynbeit pud ka Assam Meghalaya.

Ula ong ba kila dep ai lut ïaki kot ki sla kiba kynthup ïaka Map kaba naduh u snem 1896 bad ïa ka notifications 1957-58 kiba iadei bad ki jaka ia kajia bad ka Assam.

U Ma Erwin haba kren shuh shuh haka jingialang paidbah ha Khanduli kaba la pynlong da ka Namdong Block and Laskein Block Border Area Peace Committee, ula ong ba lada don ka jingbakla ha kane ka jingpynbeit pud kin kyrpad na ka Supreme Court ban thaw iaka Monitoring Committee namar ïaki jaka ba hap hapoh ka Sixth Schedule ka sorkar kam don hok ban pynphai ne ai sha ka Assam.

Shuh shuh ula byrngem ba lada don ka jingleh bor nangne shakhmat pyrshah ïaki Khasi Pnar kin ujor sha ka Supreme Court bad pan ïaka jingïada na ka Supreme Court.

Ula kren bynñiaw ruh halor ka jingpynbeit pud jong ka kylla kaba nyngkong namar baka jylla Meghalaya ka la duh noh kumba 14 hajar haduh 16 hajar square kilometre ki jaka.

“Ka sorkar MDA kala kam ba dei tang ma ka, kaba lah ban pynbeit ïa u pud u sam, hynrei ki sorkar kiba mynshwa ruh ki la pyrshang ban pynbeit ia u pud u sam bad ki shem ba kalong kaba jwat. Mynta pat ka MDA nalor ba kam tip bad shemphang eiei ha kaba iadei bad u pud u sam ka la ktah ia kane ka kam bad duh da ki hajar square kilometre,” la ong u ma Erwin.

Kiwei kiwei kiba kren ki dei u u Syiem barim ka Hima Mylliem u Bah Laborious Manik Syiem haka jingkren ula pynkynmaw ba la pdiang ïaka Jylla khlem pud khlem sam bad ka jingpyntreikam da ka North Eastern reorganization Act 1971. Ula batai ba kata ka North Eastern Reorganization Act, ka ong ban pynbeit pynbiang ïaki pud ki sam kiba dei hapoh North East kynthup ka Nagaland, Mizoram Meghalaya bad Arunachal.

U Bah Laborious Manik Syiem u la ong kamdei shuh ka kam ban dang shu ïa khot ban pynkhih hynrei shijam shakhmat u mawjam ngi la kam bad kaba nyngkong ka Khanduli bad ki 36 shnong ngin ïeng kawei ka jingmut jingpyrkhat ban dawa ïala ka hok bad haba ki ar CM ki wan ha kano kano ka por ki paidbah kin mih ryntih.

Ha kaba ïadei bad ka thaiñ Block I ula ong khlem artatien lada ki kot ki sla baroh khoit kiba ngi don ngin lah ban pynmih da ki original ka Block-1 kan wanphai sha Meghalaya.

Ha kane ka jingialang nalor ki shnong kiba hap haka Namdong Block, Laskein Block la wan shimbyntalang ruh ki nongshong shnong kiba sah ha Block I bad ki shnong ba iakhajia pud.

Ha kane ka jingialang paidbah, katba ka jingialang ka dang iaid ki paid Karbi na shilliang ka madan ki beh iaki khynnah sharia masi bad thmu ban pynthud iaka jingialang. Ha kane ka jingjia kam don kano kano ka jingjia kaba sngewsih bad ka jingialang kala iaid beit shakhmat.