Ka surok ha Mawlai kum ka St Mother Teresa Road & Ka Dikkibandi Stadium kum ka Purno A Sangma Stadium

Syllad | The Rising MeghalayaFebruary 8, 2019

SHILLONG: Wat hapdeng ka jingïaid ka jingpynkhreh elekshon MDC ha JHADC bad KHADC, ka sorkar jylla mynta ka sngi ka la rai ban pynkylla kyrteng noh ia san tylli ki surok ha Nongbah Shillong bad pynsah nam ia u Purno A Sangma da kaba ai kyrteng ia kawei surok bad stadium ha Nongbah Tura.

Haba ïakren bad ki nongthoh kot khubor hadien bala wai ka cabinet meeting, u Home Minister James K Sangma u la iathuh ba ka sorkar ka la rai ban pdiang ia ka jingai jingmut jong ka Meghalaya State Naming Authority Committee ban pynkylla kyrteng katto katne ki surok, ki shnong bad kiwei kiwei de.

U la ïathuh ia ka surok Mawlai-Mawroh sha Madan-Mawkhar hapoh Mawlai konstituensi la kyrteng ia ka kum St Mother Teresa Road katba ia ka surok Howel Road ha Laban yn tip noh ia ka kum ka Thrang Hok J Rangad Road bad ka Zikzak Road kum ka Arbendu Chaudhuri Road.

U Sangma u la ïathuh ba ka sorkar ka la ai nam ia ka surok ABP Road Batti Bazar ha Laban kum Roland Lyngdoh Road, Sylhetipara Road ha Laban kum Krepsing Swer Road bad Jackson Trace Road ha Lower Lumparing kum Melington Kharkongor Road. Bad u la bynrap ba ia ka shnong Kynshiraishan yn ithuh biang ia ka kum ka shnong Kynshi.

Haba bud ia ka nuksa jong ka Congress party, U NPP National General Secretary u la iathuh ban pynsahnam ia u Purno A Sangma u MP barim ka Tura bad u nongseng ka NPP ka sorkar ka la rai ban jer kyrteng noh ia ka Dikkibandi Stadium kum ka Purno A Sangma Stadium bad ia ka lad ba leit sha AMPT road ha Tura kum ka PA Sangma Road.