Ka surok na Tahpat Lapangap Khanduli kadei tang ka kam maramot: DC West Karbi Anglong

Syllad | The Rising MeghalayaOctober 20, 2020

Ka surok ka ban pyniasoh iaka Tahpat, Lapangap bad Khanduli kadei ka surok kaba rim bad ka kam kaba la pyntrei kadei tang ka kam maramot, ong u Deputy Commissioner, West Karbi Anglong u Syed Isfaqur Rahman.

“Kane ka surok kadei kaba rim kaba la don naduh mynshuwa bad la trei ia kane ka surok tang ban maramot (repair),” la ong u DC West Karbi Anglong haka jingialang ki ar DC jong ka West Jaintia Hills bad West Karbi Anglong ha conference hall jong ka Soil and Water Conservation, Jowai.

Ha kane ka jingialang nalor ki DC ba kynthup ruh ia u DC West Jaintia Hills u Garod LSN Dykes uba pyniaid iaka jingialang la don ki SP jong ki ar district u Bikram D Marak, ka Ramandeep Kaur, IPS, ki border magistrate jong ki ar district, ki ophisar na ki tnad bapher bapher bad ki nongmihkhmat ka KAAC bad ki ophisar.

Hadien ka jingialang ki DC la don ruh ka jingiaphylliew jingmut ki MDC ka KAAC bad JHADC haka jingiadonlang u (Dr) Mansing Rongpi MLA -20 Baithalangso, katba na ki MLA jong ka rilum Jaintia kiba hap ha jaka khappud ka Nartiang bad ka Mowkaiaw kim don satia ha kane ka meeting.

Haba kren bad ki nongthoh khubor ki ar ngut ki DC kila ong ba ka jingialang kala rai ban thaw iaki committee ha ki shnong khappud jong ka West Karbi Anglong bad West Jaintia Hills ha kaba yn iadonlang ki Waheh Shnong bad ki Goan bura ka Karbi khnang ban pynbeit iaka jingeh ki paidbah nalor ka kam khajia pud. Nalor kata yn kyntiew ruh iaka lad kamai kajih jong ki nongshong shnong khappud da kaba thaw iaki iew kiba iasyriem kum ki border haats ba ki paidbah nongrep na ki ar district kin ioh ban die markylliang ia ki mar rep kiba ki pynmih ha kine ki iew.

Ha kane ka jingialang la mynjur ba ki DC kin pyntip markylliang shwa ban sdang kano kano ka jingpyntreikam jong kano kano skim ha ki khappud.

“Ngin thaw iaki lad ban pynsuk iaka jingtreikam hapdeng ki ar district bad namar ba kine ki thain ki hap haka Sixth Schedule yn thaw ia ki lad ban kynthup lang iaki konsil khnang ban nang pynbha shuh shuh iaka jingiadei jong ki nongshong shnong ha khappud. Lada lah shuh shuh ban pynlong sha ki jingialang ban iakynduh lang bad ki cultural prokram kan nang iarap shuh shuh ia ki paidbah nongshong shnong ha khappud ban iakren ia kino kino ki jingeh,” la ong u DC West Karbi Anglong.