Ka surok na Umtyngngar sha Sohra ka la don ha ka lynti ban ïoh mang tyngka: Gavin M Mylliem

Syllad | The Rising MeghalayaDecember 12, 2020

U Bah Gavin M Mylliem, MLA ka Sohra Constituency uba dei ruh u Chairman ka Khadi and Village Industries Commission (KVIC) jong ka Sorkar Jylla u la iathuh ba ka jingthmu pynbha ia ka surok na Umtyngngar shaduh Sohra ka dang haka lynti ban ïoh mang tyngka ban pyntrei.

Ia kane une u nongthawaiñ ka PDF na Sohra, u la iathuh haba kren ha ka jingialang plie ia u mawnongrim kum ka dak ban sdang trei pynbha bad siang rong noh ia ki surok shnong (3.357 KM ka lynter) ha Elaka Laitlyngkot ia kiba la mang tyngka kumba 2 klur 70 lak tyngka na ka State Plan myn ha ka Sngi Thohdieng.

Ha kaba ia dei bad katei ka surok na Umtyngngar sha Sohra u la ong, “Nga ïohi ha ki lad pathai khubor ba u MDC ka Sohra (Bah Titos W Chyne uba dei ruh u CEM ka KHADC) u la ong ba katei ka surok na Umtyngngar sha Sohra la dep ïoh mang tyngka hynrei kam long kumta bad ka file ka dang sahkut bad ngim pat ioh ia ka mang tyngka ban pyntrei”.

Da kaba iathuh ba ia ka surok na Umtyngngar sha Sohra la siang rong pynbha naduh u 2012, u la ong, “Ïa kane nga la rah ha ka Ïing Dorbar Thawain ka Jylla bad nga la phah jingthoh sha u Myntri Rangbah halor ka jingdonkam ban pynbha noh ia kane ka surok. Ngi la ia mir jingmut ban pynioh mang tyngka na ka Systematic Maintenance Programme bad pyrshang ban ïoh 12 klur tyngka ban pynbha ia kane ka surok”.

U la ong ba ia mynta hi ka dang sahkut bad kam pat poi ka mang tyngka na ka tnad PWD (Roads) kaba mang ban pynbha ia ki surok khamtam kane ka surok kaba la ktah ia ka leit ka wan khamtam kiba wan jngohkai ia ka jingitynnad ka Sohra. U la ong ba kum u nongmihkhmat um kwah ba ka ktien kan jam ia ka kam. “Ngam ju kular shwa ka por bad ngan trei na ka bynta ka biang ka bit ki nongshong shnong”, u la ong.

Ha kaba ia dei bad ki surok shnong ha Laitlyngkot da kaba ai khublei ia ki ophisar, ia u Myntri Rangbah bad Symbud Myntri Rangbah, u la ong, “Ngi donkam ka jingïatreilang ban kyntiew ia ka roi ka par ha ka Constituency bad kum ka Sorkar ngi shim kongsan ia ka koit ka khiah, ka pule puthi, ki surok bad ki lynti syngkien, ka um bam um dih bad kiwei kiwei pat”.

Kiwei kiba la donlang ha kane jingïalang kaba la pynlong ha Ïing Dorbar Shnong ka Dong Nongthymmai-Lumthangding, Elaka Laitlyngkot ki kynthup ia u Bah David Pyngrope, Executive Engineer PWD (Roads), NH Shillong Bye-Pass Division, u Bah Allenson Shabong, Sordar, Bah R Majaw, Rangbah Shnong, Bah T Dkhar, Rangbah Shnong, ki riewrangbah lem kiwei pat.