Ka syrwet na tyllong ki ktien

Syllad | The Rising MeghalayaDecember 3, 2023

Ki ktien iapan ki ba dang lah ban kiar bad ki ba dang don da la ki ktien tynrai te la sngew dei ban pynneh da ka ktien tynrai bad ban pdam noh ia kita ki ktien iapan. Ki nuksa halor kane lehse lah ban kdew kum ia ka ktien iapan ‘phatok’ dei ban pynneh beit da ka ktien tynrai ‘byndi’ bad ‘along’; ka ktien ‘lait’ dei ka jingshai na ka bording ka ba dei ka ktien iapan ba lah ban pynneh da ka ktien ‘dingshai’ ba la buhti ha ka imlang sahlang bad la sngewthuh paidbah, nalor ba ka pakhuh bad ka ktien tynrai ‘lait’ ka ba mut ba la khlad na kaei kaei; ka ktien ‘droks’ ne ‘kynja’ dei ka ktien iapan ba lah ban pynneh da ka ktien tynrai ‘kani’ ne ‘aphin’ kat ka ba lah ban pynbiang ktien, khamtam ba ka ktien kynja ka thew da kumwei ruh kum ki jait bapher; ka ktien iapan ‘taïar’ dei ban pynneh da kawei pat ka ktien iapan ‘shaka’ ka ba kham rim bad tip paidbah lane da ka ktien tynrai shalyntem, khamtam ba ka ktien ‘taïar’ ka kit jingmut sa da kumwei na ka ktien iapan ka ba mut ban ‘pynkhreh’; ‘phlop’ dei ban pynneh da ka ‘bijai’ ne ‘sepei’; ia ka ktien ‘komper’ dei ban pynneh da ka ‘nujor’; ia ka ktien ‘trai’ kum ha ka ba ‘pyrshang’ eiei dei ban pynneh da ka ktien tynrai ‘pyrshang’ namar ba ka syrdoh bad kulmar jingmut bad ka ktien tynrai ‘trai’ ka ba mut ia ki kynrad ba kam nongkynti ia kaei kaei; ia ka ktien ‘saiñ’ kum ha ba ‘soi’ kyrteng dei ban pynneh da ka ktien tynrai ‘soi’ namar ba ka syrdoh bad kulmar jingmut bad ka ktien tynrai ‘saiñ’ ka ba mut ban phrang ha shlem ia kaei kaei; ia ka ktien ‘step’ kum ki ‘kyndon’ mawjingkieng dei ban pynneh da ka ktien tynrai mawkyndon ne mawjingkieng, namar ba ka syrdoh bad kulmar jingmut bad ka ktien tynrai ‘step’ ne ‘mynstep’ ka ba mut dang phyrngab mar ia mihsngi haduh shwa shiteng sngi. Ki dang byllai ki ktien lada dei ban kdew bad ñiewtang, tangba la shu antad ba ki paidbah ki la lah ban peiphang ia kaei ka ba la kynthoh.

Ki don ruh ki ktien ki ba ym lah ban poiphang ba kumno ki la mih thymmai ne ba la don lypa ki ba syrïem bad kano kano ka jingmut ba mynnor namar ba ym don ka snap na kano kano kawei pat ka ktien jong kino kino ki paidbynriew na marjan ne marjngai. Kum kita ki jait ktien ym lah ban kam thikna ba ki dei ki ktien tynrai ne ktien ba iapan namar ba ym don ki tyllong ba thikna ban pynskhem ia kata. Kum kita ki ktien ki long ka ktien pita- ia u jingthew jaiñ jong ki dorji, mynja- ia u sla ba mih umshkah ha ka ba ju khleh bad ki kynja iit ba la dung ni na ka bynta ban bsuh ha u ksai pynher kotkudi, latai- ia ka kor shalyntem kyllaiñ ksai, ïit- ia ka mar ba long snep bad pyrshi bad shai ha ba peit lyngba, miej- ia ka mar ba buh tiar ha kynjang na ka ba shong ki briew, rynda- ia ka tiar ba khrud jlih ia ka dieng lynter, paiñtali- ia u tiar ksam thliew ha ka dieng syriem kum u shniah shoh maw, kurat- ia ka tiar ot dieng kum ka wait ba don bniat, rashi- ia ka tiar ot jyntang kba ba don bniat, shuri- ia ka wait sum, duli- ia ka mar ba buh tiar ban kynshew bad khang kdam da ka dwar, sati- ia ka ksah ba deng ha shympriah kti ba ju tip ruh kum ka sahti, khadu- ia ka tiar pynirong ba deng ha ryndang kti, khaila- ia ka sohshkor ba deng pynirong ha shkor, latom- ia ka tiar tylli pyllon ba sieh nar juloi na ka bynta ban pynshad ha tbian khyndew da ka ba ring da u ksai, thyrnia- ia u nar suh ba stang ba lah ban thep da u ksai na kia bynta ban suh jaiñ suh nep, sisa- ia u narpyllon ba kat ki shyieng sohiong sohmanir lane ka isbad ba um da ka ba shet tyrha ha ding,  lyngka- ia u nar tylli lynter ba nep kum u sum na tduh ba ju tih maw tih khyndew, sdie- ia u nar lyngkhot ba shut nep syrti shiliang na ka bynta ban pom dieng,  ksai- ia u snur jaiñ ba thir bad suh jaiñ, bad kiwei kiwei ki ba kum kita. Yn dang mih shuh shuh bad lah ban dang kdew hadien ruh ha ki jingthong ki ban dang bud ryngkhi.

Nalor ki ktien iapan ne ba shim kylliang bad ki ktien tynrai, ki don ruh ki ktien ki ba la shu mih hi ha ka imlang sahlang na ki paidbynriew lyngba ki ryta  ki ba da ki ktien tynrai bad ki ba kit jingmut sbiak ia kiei kiei ki ba ha ka juk thymmai mynta kum ka ktien ïa ka sopti- ka ba thew ia ka jaiñ sop kti, soplun- ka thew ia ka jaiñ sop na syngkai sha kjat ha ka ba la pynshong ha ka lyeit ka ba don ruh ka ktien tohmet ba ju ong ka lun, liengsuiñ- ka thew ia ka lieng ba kie ha suiñ,  lyntang- ka thew ia ka dieng lynter ka ba stang, dieng pynïar- ka thew ia ka dieng tylli ba pun ha ka jingïar, kynroh- ka thew ia ka kynton ba ker da ka ba sieh proh dieng thynram, dewbilat- ka thew ia ka khyndew ba wanlam na Bilat, diengkot- ka thew ia u dieng jingthew lynter ba lyngkot, thyrnia- ka thew ia u mar ba suh jaiñ kum ba thir ksai, plakot- ka thew ia ka pla ba shna da ka kot bad ia ka pla ba kit kot pule, korsuhjaiñ- ka thew ia ka kor ba suh jaiñ, sairusom- ka thew ia u ksai ba jlih kum u rusom, kotkudi- ka thew ia ka kot pynher ba kiew ne kie ha suiñ, khiewranei- ka thew ia ki khiew khyndew na shnong Larnai, liangthar- ka thew ia ka pliang ba siang pathar, lyngknot- ka thew ia ka lyngkhot dieng ba pynlong knor ban shong, motdur- ka thew ia u mot ba don artat ka dur ba shu shtah, sohshkor- ka thew ia ka soh ksiar ne soh rupa ba kieng ne deng ha shkor, bad kumta ter ter.

La khmihlynti na ki paidbah nongpule ruh ban kynthoh lada don ka rukom batai ba lymbiang ban ai jingmut da ki ba thikna na ka bynta ban synñiang shuh shuh kum kita ki ktien khnang ban kynshew ha ka thiar jong ka thoh ka tar Khasi. Kino kino ki ba la kloi ban synñiang na kano kano ka bynta ki lah ban phah ha email: [email protected] lane Whats App 9436103992, kat ka ba kham sngewbit sngewbiang.