Ka tamasa Iadaw Masi Rong ka Elaka Raliang haka 30 tarik Naitung

Syllad | The Rising MeghalayaJuly 29, 2022

Kumba ju long man la ka snem hadien ka jingbet ia u symbai u phniang ka Raliang Elaka Arts & Cultural Organisation (REACO) kum shi bynta ban ioh iakynduhlang u khun u raiot ka elaka Raliang, kan pynlong iaka tamasa Iadaw Masi Rong ha madan Pamsna, Laskein haka 30 tarik Naitung 2022.

“Kane ka Jingialehkai Tamasa la ju pynlong shi sien shi snem naduh ki longshwa manshwa jong ngi, hadien ba ki khon ki raiot jong ka Elaka ki la dep ban bet ban thung ia la ki symbai ki phniang sha la ki lyngkha risa jong ki,” la u kyrwoh ka REACO

Ban pynphuh pynphieng shuh shuh ia kane ka iadur masi rong, ki don ruh bun jait ki jingialehkai kum ka jingshad tynrai, latan tyllai, Flat Race, Phet Nangsiang & ka laknieh Shuki (Musical chair) nalor kiwei.

Ban pynshlur bad ban ai mynsiem iaki khun ka elaka haka pule puthi ka elaka kan ai khusnam bad mynta kynti yn ai iaki ioh marks heh duh ha ka “Exam 2020, 2021 & 2022” ha ka kyrdan SSLC (Class X) & HSSLC (Class XIl: Arts, Science & Commerce Streams), hadien bala sangeh ban ai ha snem 2020 bad 2021 hadien ba wan lyngshop ka khlam ka ngoh.