Ka tamasa Sohtrun kaba ar ka Jylla haka nongbah New Delhi naduh 10 tarik Naitung

Syllad | The Rising MeghalayaJuly 10, 2024

Ka bynta kaba ar jong ka tamasa iew Sohtrun ba la tip kum ka ‘Pineapple Festival, 2024’ ba la pynlong da ka Sorkar Meghalaya kan long ha iew Dilli Haat ha ka nongbah New Delhi naduh ka 10 haduh ka 14 tarik mynta u bnai.

Hadien ka jingjop ha ka tamasa kaba nyngkong, u Sohtrun (Kew Pineapple) ba thiang bad shngain ba la pynmih na kane ka jylla u la ioh pdiang shibun ki jingiaroh ym tang hapoh la ka jong ka ri hynrei na ki ri kiba na shabar kumjuh, kata khamtam hadien ka jingshalan kaba haduh 3.5-million-ton u Sohtrun sha ka thain Middle East dang ha u bnai Jylliew 2024.

Na ka liang u Myntri Rangbah ka Jylla u Conrad K Sangma, ka Myntri ka Tnat ka rep ka riang ka Kong Ampareen Lyngdoh, u Commissioner & Secretary ka Rep ka riang u Dr Vijay Kumar, ki ophisar na ka APEDA lem bad ki nonseng kam ba kongsan bad ki nongrep na Meghalaya kin iashim bynta lang ha kane ka tamasa.

Kumta ruh na ka liang ka Sorkar Jylla ka khot ka wer sngewbha ban wan bad mad ia ki jait Sohtrun bapher bapher ba la pynmih na kane ka jylla ha katei ka iew Sohtrun ha Dilli Haat, New Delhi.

Na ka liang ka Sorkar Jylla ka la shimkhia na ka bynta ban pynneh pynsah bad ban kyntiew ha kaba iadei bad ka jingpynmih ia une u jait soh uba bang ba shngiam bad uba lah ban pyniaid iew sha ki jaka iew bapher bapher jong ka ri bad shabar kumjuh.

Nalor kata ki kynhun bapher bapher jong ki nongrep kin leit jngoh ia ki jaka bapher bapher ha la ki jong ki sngi, kata kaba kynthup ha Azadpur Mandi bad Mother Dairy Facilities ha Mongolpuri nalo kiwei pat ki jaka.

Dang shen na ka liang u Myntri Rangbah ka Jylla u la leit jurip ia ka dukan ba la die ia u sohtrun ha katei ka nongbah khnang ban lah ban plie rynsan na ka bynta ki nongrep bad ki nongtrei kam lajong ha ki iew ki hat. Kane ka tamasa kam dei ruh tang ban shu pyni ia kine ki Sohtrun hynrei ruh ia ka khana shaphang ki nongrep ia une u jait soh bad ia ki nongtrei kam lajong kiba la ioh ia ka jingphai khmat hapoh ka thain kumjuh ha ka ri bad shabar jong ka ri.