Ka Thain Labang-Nongphyllut, Nongphyllut Dolloiship Bad Pangam-Raliang ka dei ban wan sha Ri Jaintia Meghalaya

Markus M ThaiangAugust 12, 2021

Haba pur ia khana parom shaphang ka Hima u Syiem Sutnga,u Syiem uba synshar ia ka Ri ki Khat-ar Doloi, ki ‘riewtymmen ki ong ba kane ka Hima ka long kaba khraw bor, kaba iar u Pud u Sam bad ruh ka Hima kaba dap kaba biang, la ka long ha ka liang ka bam ka sa, ki jaka rep jaka riang lane ha ki tiar iada ri kum ki Ramshadi, ki Khnam, ki Ryntih bad kum juh ha ka liang ki riewkieng wait kiengstieh.

Haba pyrshang ban pule na ki kot ki sla khamtam na ka jingthoh ka “AHOM CHRONICLE” la ong ba ki Phareng ha ka jingwan hiarthma jong ki ia kane ka Hima ha ka snem 1835, ki Phareng kim shym la jopthma ia baroh kawei ka Hima bah u Syiem Sutnga bad halor ka jingioh batbor jong ki Phareng, ki la pynbna tang kumba shibynta na ka Hima u Syiem Sutnga.

Haba sngap na ka jingiathuh khanaparom ki riewtymmen jong ka thain Labang-Nangphyllut bad khamtam haba pule na ka Khanatang (History) jong ki Syiem Ahom, kiba synshar donbor ia ka ri Assam ha ki snem kiba 1500 AD eiei, ia kiba la buh jingthoh da u Sir Edward Gait, la ong ba ka Hima u Syiem Sutnga, ka long ka Hima kaba khlainbor,kaba khrawbor bad kaba dap kaba biang, ka Hima kaba kat ka Hima lane ka ri kaba la biang lut nadong shadong.

Na kaba nga iohsngew ia ka jingiathuhkhana jong ki ‘riewtymmen jong ka thain Labang-Nangphyllut, nga shim ia kane ka por kaba khyndiat ban thoh ia kane ka Khanatang( Parom) wat ka long tang ban pyniahap ia ka jingong kaba ong “ LA KA RI MYNHYNDAI LA NGIM IOHI SHUH,HYNREI JUNGKYNMAW IEID IA KA KIN YM DUH” Da shisha ha kane ka juk jong ngi mynta ngim tip shuh shaphang kane ka Hima u Syiem Sutnga, ka Hima kaba heh, kaba khlainbor,kaba iar u pud u sam, namar ba ngim ju kyrtiang dien ia ka mynnor bad iabeh satang shaphang ka juk Science and Technology ka juk kaba mynta.       

Ha Rilum Jaintia ngi don shibun ngut ki riewshemphang, kiba nang kiba stad bad ki prohjabieng bad lada kine ki stad Janor jong ka Ri Jaintia ki pyrshang ban lum jingtip shaphang kane ka Hima u Syiem Sutnga, ka danglong kaba suk ban thoh History shaphang kane ka Hima, kaba ki longshwa manshwa jong kane ka Hima ki la thied dala ka snam ba kordor jong ki na ka bynta jong ki wandien ki mandien.

Ki longshwa ki manshwa ki la buh la tei ia kane ka Hima, ka Hima kaba la bianglut nadong shading na ka bynta ka pateng ka jaitbynriew ka ban dangwan, pynban mynta kane ka Hima kaba iar u pud u sam ne u PUD U ANG kaba khlainbor, kaba khrawbor mynta ka la kylla sha ka District kaba rit bad ka la nangrit shuh shuh da ka jingpynkhlad jubor ia ka thain Labang-Nangphyllut bad Pangam-raliang bad ia ka thain Nangtung Khyrwang na ka Ri Khat-ar Doloi( Ri Jaintia ba mynta) bad pyniasoh sha ka Mikir Hills( Karbi-Anglong ba mynta) ha ka 13 tarik April 1951 bad mynta ka la nangrit shuh shuh da ka jingwan tap pud ka District Karbi-Anglong  Assam na sha ka thain Mookoiram, Rtiangsanphaw, Khanduli, Lapangap, Mukroh, Saba,Khatkasla bad na sha ka thain Ratacherra.                        

Ka don ka jing ong jongno re kaba ong “RI JAINTIA WIAR NAM” lada ngi shim ia kine ki kyntien ngim tip shuh kumno kan long ka lawei jong kane ka Hima bah kaba katba nangmih ki sngi bad ka por ka la nangrit nangrit, kaba mynshwa ka Hima kaba khlainbor bad kaba synshar donbor naduh ki por jong u Syiem Prabat Roy, haduh ka por jong u Syiem Rajendra Singh, u Syiem uba la shah pynhiar khet jubor da ki Phareng ha ka snem 1835.

Haba pule na ka jingthoh ka “AHOM CHRONICLE” kaba ha ka por ka jingsynshar u Syiem Sutnga, u Prabat Roy, uba synshar naduh ka snem 1500 haduh ka snem 1516, la shem ba U PUD U SAM jong ka Hima u Syiem Sutnga, u iar na shaphang shatei Wahkyllang, mihngi wah Bramahputra haduh skha Bramahputra bad ka wah Kupli ter ter ka wah Kupli shaduh Shaparmuk bud pat sha ka wah Kero ter ter shaduh pyntha jong ka wah Surma, shathie Setback Parganas kaba long kawei na ki 17 Parganas ( hajan Tripura) kynthup ia ka Sylhet ( Shilot) bad sha sepngi ka wah Umngot- Khyriem Syiemship- Khanapara bad Gabha Mauza jong ka Nowgong.

Kat kum ka History la shem ba ha ka snem 1835, haba ki Phareng ki la pynhiar khet ia u Syiem Sutnga, u Rajendra Singh, ki Phareng ki la pharia ia ka ba Hima bah Sutnga lane Hima bah Jaintia ( Jaintia Empire). Ia ka bynta ba shatei jong ka Hima bah Sutnga ki la ai sha ka Nowgong, ia kaba shathie sha Sylhet( Shilot), ia ka thain Kutsajar sha ka North Cachar katba ia ka Elaka Labang- Nangphyllut, Nangphyllut Doloiship, naba ki nongshong shnong ki dei ki Jaintia (Pnar) ka Sorkar Phareng ka kdup hapoh u pud u sam jong ka Jowai Sub-division lane hapoh u pud u sam jong ka United Khasi & Jaintia Hills.

Hadien ba ka Ri India ka la ioh ia ka jinglaitluid na ka jingsynshar ki Phareng ha ka 15 tarik Nailar 1947 (August 15,1947), ka sorkar Assam na ka bynta ka jingbit jingbiang ka jingsynshar jong ka, ka la thaw (create) sa kawei ka District bathymmai, ia kaba la tip kum ka Mikir bad North Cachar Hills,da kaba khliah jubor bad pyniasoh jubor( forcibly tagged) ia ka thain Labang-Nangphyllut, Elaka u Doloi Nangphyllut, nangta sa shi bynta ( a part) na ka Elaka u Doloi Raliang( kaba kham iatip mynta kum ka Pangam-Raliang) bad shibynta na ka ka Elaka u Dolloi Shilliang Myntang bad shi bynta na ka Elaka u Dolloi Nongjngi na ka Jowai Sub-division lane na ka United Khasi & Jaintia Hills District. Wat hapdeng ka jingpyrshah na ki paidbah nongshong shnong jong kine ki Elaka kiba la pyniasoh jubor sha ka Mikir Hills( Karbi-Anglong ba mynta) ha ryngkat ka jingpyrshah da u MLA ka Ri Jaintia (L) ma Larsing Khyriem( Note of dissent from the then MLA (L) Larsing Khyriem)  bad ka Jaintia Durbar.

Ia ka Elaka u Dolloi Nongphyllut bad ia ka thain Pangam Raliang,ka Sorkar Assam lane ka Mikir Hills( Karbi-Anglong ba mynta) kim lah ban len ba ka dei ka bynta jong ka Jaintia Hills( Part and Parcel of Jaintia Hills) bad kaba ki nongshong shnong kim kwah ban khlad dalei lei ruh na la ki doh ki snam bad na Ri Jaintia.Wat hapdeng ka jingpyrshah, ka sorkar Assam kam shym la shah skhor bad pyniakhlad jubor bad pyniasoh ia kane ka thain bad pynmih syndon da ka Purwana No. TAD/R/31/50/149 dated the 13th April 1951( Assam Notification No. TAD/R/31/50/149 dated the 13th April 1951).

Ka Sorkar Assam hadien ba la pyniasoh ia ka thain Labang Nongphyllut, Elaka u Dolloi Nongphyllut bad ki bynta jong u Dolloi Raliang, Dolloi Shilliangmyntang bad ka shibynta ka Elaka u Dolloi Nongjngi ka la babe kylla ba kane ka jingpyniasoh jubor jong ka ia kane ka thain( ia kaba la kham iatip mynta kum ka “BLOCK I”) ka la long kum ka jinglehbein ia ki Pnar( Jaintia) kiba shong ha kane ka Block I bad ha ka snem 1955 ka sorkar Assam da ka shithi jong ka No. TAD/REV/99/55 dated Shillong the 21th November 1955,ka la pyndam noh ia kane  ka Notification No. TAD/R/31/50/149 dated 13th April 1951 bad pynmih da kawei pat ka hukum, Government of Assam Letter No.TAD/Ga//83/50 dated 5.11.1957,ha kaba la hukum ia ki ar District Council United Khasi & Jaintia Hills bad Mikir & North Cachar Hills ban leit juriplang( joint enquiry) ia kane ka thain Block I.

Kat kum ka hukum ka Sorkar Assam  Shithi No.TAD/Ga/83/50 dated 5.11.1957 la pynlong ia ka Joint Enquiry jong ki Nongmihkhmat ki ar District Council United Khasi& Jaintia Hills bad Mikir&North Cachar Hills, kaba la sdang ha ka 17-19 tarik February 1958 na shnong Umbasoo bad kut ha ka 23 tarik February 1958 ha shnong Jrikyndeng ha kaba la ia mynjur lang ba ki shnong kiba don hapoh ka Elaka u Dolloi Nongphyllut bad baroh ki shnong Pnar kiba don ha kane ka thain yn pynphai biang na ka Mikir Hills sha ka Jowai Sub-division jong ka Unted Khasi& Jaintia Hills District kumba ki long naduh hyndai hynthai.

Ka jingiakren shaphang ka jingpynphai ia ka Elaka u Dolloi Nongphyllut bad Pangam Raliang ( Block I) ka la iaid na ka por sha ka por bad mynta ka la iaid ha ka Political Chief Ministers Level talk hapdeng ki Myntri Rangbah jong ka Meghalaya bad ka Assam bad na ka liang ki paidbah nongshong shnong jong ka Elaka u Dolloi Nongphyllut bad kiwei de ki jaka jongu Dolloi Raliang, Dolloi Shiliangmyntang bad u Dolloi Nongjngi ki dei ban wan hapoh u pud u sam jong ka Ri Jaintia Meghalaya.