Ka Thma Ktien hapdeng u Bah Prestone bad ka Kong Angela naka pisa kyrshan nongbylla sngi na ka khangdam COVID-19

Syllad | The Rising MeghalayaMay 25, 2021

U Symbud Myntri Rangbah ka Jylla, uba bat ruh iaka tnad Labour, Bah Prestone Tynsong ula pynksan ba ka sorkar ka hap ban leh thik ba thik ban ai iaka pisa sha ki nongbylla sngi kiba la register bad shi naia ruh ym shym la pyndonkam bakla.

Haba pynshai sha ki nongthoh khubor haka sngi Nyngkong, ula kynthoh ruh ba ka Kong Angela Rangad nongialam jong ka Thma U Rangli-Juki (TUR) kala kynnoh khlem nongrim bad kren khliehbiej bad kam don kano kano ka jingshisha halor ba la pynjah ne tuh iaka pisa kaba la thmu ban kyrshan iaki nongbylla sngi na ka jingkhang dam Lockdown mynshem snem ban iakhun pyrshah iaka khlam COVID-19.

Kane ka pisa iarap iaki nongbylla ka dei na ka Chief Minister’s Relief Against Wage Loss (CMRAWL) kaba T.2100/- bad kawei pat naka tnad Labour lyngba ka skhim Meghalaya Building & Others Construction Workers Welfare Board (MCBOCWB) T.5000/-

Haduh 135241 ki nongbylla sngi kila register haka CMRAWL bad 25684 haka tnad Labour hapoh ka MCBOCWB.

Ka Kong Angela kala ieng haka nongrim ba kam shym la kynnoh kynta klumar, hynrei baroh ki kot ki sla kiba ioh ka dei na ka sorkar lyngba ka jubab Right to Information (RTI) ne ka hok ban tip kaba kila pan jingtip hadien bala don ka jingujor ba bun na ki nongbylla kim shym la ioh iaka pisa kaba ki dei ban ioh.

Ka Angela kala ong shai ba ka pisa kam shym la poi hok sha u nongbylla sngi uba la duh bai bylla namar ba hap ban shongkhop ha iing na kitei ki ar tylli ki skhim iarap. Kala dawa ruh na ka sorkar ban pynioh iaka hok jong u nongbylla hapoh ha kane ka taiew.

Lap ka TUR ba jyrsieh ka bamsap naka pisa khlam COVID-19 ban kyrshan iaki nongbylla sngi