Ka Thymmei Ka Tynre Ka Tyllong

Syllad | The Rising MeghalayaJanuary 15, 2023

Hadien ba la pynbit pynbiang janai, la ioh ban pyllait biang ka phlim shaphang ka thymmei wan longbriew manbriew ba shongblei, ka tynrai ka longbriew Hok Manblei Sot, bad ka tyllong ba khuid ba suba jong ka rukom long rukom man ba kyrpang bad ba bun rukom jong U Hynniewtrep Hynñiawasa.

La ioh ban jer kyrteng thymmai ïa ka kum “Ka Thymmei Ka Tynre Ka Tyllong” (The Origin, The Essence, The Source).

Ïa kane ka phlim la ïoh ban pyllait paidbah ha ka sngi kaba nyngkong ka Lympung ki Khynnah Seng Khasi Seiñ Raij ba Khadhynñiew ha ka shnong Krang,  ha a 14 tarik u Kyllalyngkot 2023, ia kaba  la pyllait ïa ka da U Pa Dalloi Elaka Jowai, Ma Puramon Kynjing bad kumjuh U Rgh Gideon Kharmawphlang (IAS) Deputy Commisioner, South West Garo Hills.

Ka phlim ka kwah ban pynpaw ha khmat ka pyrthei ïa ka thymmei pyrkhat Niam jong U Khasi lyngba ki khanatang, khamtam ka khanatang U Sohpetbneng kaba batai shaphang ka jingwan longbriew manbriew U Hynñiewtrep Hynñiawasa sha sla pyrthei bad kaba batai ruh kumno ka la san ka pyrthei, ka lyngit ka lyngor bad ka deiti kyntang jong ngi baroh bad ruh  ban ri sumar ïa ka Mei Ramew.

Shuh shuh la pyrshang ban  pynshai ruh ïa ka bynta ba kyrpang jong U Lum Diengïei bad ka khanatang shaphang U Lymboit Lymbiang U Syiar Ryngkuh bad Ka Mei Syiem Sngi ha Krem Lamet Latang.

Kane ka  phlim ka kwah ban pynshai ka nongrim halor kaba U Khasi u sngewthuh ialade, ka jing ïa teh jutang bad U Nongthaw Nongbuh bad ka jing iadei u khun bynriew bad kiei kiei baroh.

Ka khana ka sdang naduh ka Hok nyngkong bad kan ïai bteng haduh bym don jingkut, bym lah ban kynjoh lyngba ka jingim jong iwei pa iwei i mynsiem ba la kha na Ka Hok Ka Shi Kyntien ka Bri U Hynniewtrep

Ban lah ban tip janai shaphang U Khasi, hap ban sngewthuh ruh ïa u sohpet ksiar sohpet rupa jong ka jingiadei naduh ki pa thawlang bad ïawbei tynrai ka jingwan long briew lyngba u lum ba kyntang  U Sohpetbneng, bad na u sohpet ksiar sohpet rupa  la saiñ dur ïa ka tynrai jingngeit Niam Khasi – Niamtre.

Ia kane ka phlim la shwa bad pynwandur ia ka ha ki saw tylli ki bynta bad kita ki long  Sohpetbneng, u Diengiei, U Khraw Jutang bad ka  Mynsiem Ksiar

Kumban shu pynpaw ba ha kaba nyngkong, katta ha u snem 2021, ïa kane ka parom jong kane ka phlim la ai kyrteng ïa ka “Ka Hok Ka Shi Kyntien”, hynrei katba nang ïaid pat ki sngi, la sngew donkam ban pynkylla noh ïa ka kyrteng ka jong ka, kum shi bynta ban nang lah ban kham ngam jylliew ne ban tih naduh tynrai  ïa ka jingmut kaba janai jong kane ka phang.

Ia kane ka phim lah ruh ban peit lyngba ka youtube ka Seng Khasi Kmie.