Ka Tnat Civil Defence & Home Guard ka don ia ka bynta kaba kongsan ha ki kam aijingiarap: Comingone

Syllad | The Rising MeghalayaDecember 7, 2023

Ka Tnat Civil Defence & Home Guard ki don ia ka bynta kaba kongsan ha kaba iadei bad ki lad aijingiarap ha kiba bun ki kam kiba donkam kyrkieh bad haba jia kino kino ki jingshah pynjulor ha ki bor ka mariang lane kiba leh da u briew,” ong u Myntri sorkar jylla uba khmih ia kane ka tnat u Bah  Comingone Ymbon haba kren kum u Kongsan 61st Raising Day ka Civil Defence and Home Guards haka 6 tarik Nohprah ha ka jingialang kaba la long ha CTI Parade Ground, Mawdiangdiang, Shillong

U Myntri u la ong ruh ba dei ban pyrto ia ka bynta ba la shim da ki volunteer ka tnat Home Guard ha kaba iadei bad ka jingpyniaid kali, ban pynbiang pahara ia ka jingtei jong ka Assembly bad ban iarap ia ki pulit ha kaba aijingiada ia ki puja pandal bad na ka bynta kiwei pat ki jinglehkmen bad ki tamasa bapher bapher.

Nalor kata u Bah Ymbon u la ong ba kine ki artylli ki kynhun ki don ruh ka bynta kaba khraw ha kaba aijingiarap ia ki bor sorkar bad ia ka tnat pulit na ka bynta ban pynneh ia shongsuk shongsain bad ha kaba iadei bad ka jingpynbiang pahara na ka bynta ki riew pawkhmat, ha ka jingpynbiang pahara na ka bynta kiba bun ki tnat treikam ka sorkar pdeng, sorkar jylla bad kiwei pat ki jaka treikam.

Da kaba kdew halor ka bynta kaba kongsan jong ka kynhun ha kaba aijinghikai ia ki nongshong shnong halor ki lad jingiada bad ki kam aijingiarap, u Myntri u la aijingmut ia ka Tnat ba kan shim ia ki jingiarap ba pura jong ki dorbar shnong, ki nokma bad kiwei pat khnang ba yn lah ban ialap bad pynshai paidbah bad ban lah ban iakhun pyrshah ia kino kino ki jingeh.

U Myntri u pyntip ruh ba kane ka tnat ka la aijinghikai ia palat 7110 ngut ki riew paidbah bad ki samla pule ha kaba iadei bad ka Disaster Management, Search & Rescue bad First Aid ha ki jaka sor bad ki thain nongkyndong. U la ong ruh ba ha ka snem 2022-23 ki la don haduh 2531 ngut ki Home Guard volunteer bad 330 ngut ki Civil Defence Volunteer kiba la ioh jinghikai. U la ong ba haduh kumba 1391 ngut na kine ki Home Guard volunteer mynta ki la don bynta ha ki Tnat sorkar bapher bapher kumjuh ha ki jaka treikam shimet bad kiwei pat.

Katba na ka liang ka Kong I Nongrang, IPS, Director General of Civil Defence & Home Guards, Meghalaya haba aijingkren ha ka jingialang ka la ong ba ka tynrai jong ki pulit Home Guard ka dei lyngba ki kynhun aijingiada trai shnong bala thaw ha ka por jong ka thma bah ba nyngkong hapoh United Kingdom, ha kaba ha India ia ki Home Guard la thaw ha Mumbai ha ka 6 tarik Nohprah 1946, kaba long ruh ka daw ba ia kane ka jingrakhe la rakhe man ka snem ha kane ka tarik.

Shwa kane u Kongsan u la pyndeng medal ruh ia ki san ngut ki dkhot ka tnat Civil Defence bad Home Guard bad sam ruh ia ka Director General Civil Defence Disc & Commendation Certificate, MHA, New Delhi 2022, sha ki 12 ngut kiwei pat.

Kumjuh na ka liang ka Kong I Nongrang IPS ka la sam ia ka khusnam Director General of Civil Defence and Home Guards, Meghalaya Cash Prize &Commendation Certificate, 2021 sha ki hynriew ngut ki dkhot ka  CD & HG kaba kynthup ia ka khusnam kaba da ka pisa.

Kiwei pat kiba la ia don lang ha kane ka sngi ki kynthup ruh ia ka Kong MW Nongbri, Executive Director, State Disaster Management Authority (SDMA), Kong C Kharkongor, Secretary, Civil Defence & Home Guards Department,  A Agarwal, IPS, Inspector General of Police, CRPF, MK Sangma, Joint Director of Civil Defence, Meghalaya, Bah RP Khongwar, Joint Commandant General of Home Guards, Meghalaya, Bah V Syiem, IPS, SP City, bad ki ophisar ba la shongthait jong ka tnat.