Ka UDP ka thei bha briew ha Jowai ka khring ia kiba bun ban ioh iaka ong u Moonlight Pariat

Syllad | The Rising MeghalayaMay 28, 2022

U Ma Moonlight Pariat uba khot ieid Bah Hep uba long u president jong ka United Democratic Party (UDP) West Jaintia Hills District Unit ula pynbna ba un aireng biang iaka elekshon MLA 2023.

Ia kane ula ong haba pynskhem iaki nongkitkam primary Unit ka Jowai Circle jong ka UDP kiba haduh 29 tylli na ki 36 tylli haka jingialang kaba long ha iungwalieh ka dorbar shnong Dulong, Jowai haka sngi Saitjain.

U Ma Pariat haba kren ula ong u la rai ban iakhun biang ia ka MLA Election 2023 na Jowai Constituency na ka UDP bad ula ai shithi ruh ban pan iaka ticket UDP.

Ha kane ka jingpan ticket da kawei ka sur ka primary unit baroh kila ai ka jingkyrshan bad rai ban pynieng biang ia u ma Moonlight Pariat kum candidate jong ka UDP na Jowai Constituency.

U ma Moonlight, uba la long ruh u MDC ka JHADC la san samoi bad bad uba la iakhun ruh la lai sien ia ka MLA Electionm hynrei um pat ioh ia u soh ka jingjop bad ha kane ka kynti ula rai ban iakhun biang iaka elekshon ka dei na ka daw ba shah iehbien ka Jowai Constituency ha baroh ki liang.

U ma Pariat haba kren haka jingialang u la ong ruh kumba long mynta ka UDP ha Jowai ka long kum ka thei samla kaba bha briew kaba la dep ban pynbha pynmiat kaba la dep tah lipstick tah powder bad ki jingiwbih jong ka, kala khring ia kiba bun ban ioh ia ka.

Ula ong ruh ba ki don ki kyrtong na kiwei ki party kiba kwah iaka ticket party UDP bad kila pynbna ruh kin ioh iaka ticket, hynrei ka ticket UDP kam dei kaba lah ban ioh da kaba shu thied ne pynbiej ia u paidbah tang na ka daw ba bhabriew.

Ula ther tyngeh ruh ba tang ka election committee ym pat thaw hapoh ka party, hynrei kaba lyngngoh kumno kine ki kyrtong kiba kwah iakhun elekshon kila pynbna ba kin ioh iaka ticket naka Party UDP ban ia khun ia ka MLA Election 2023.

“Ngi kiba don hapoh ka party ngim tip ne ngim pat rai, hynrei ki Congress kaba don ar kynhun kila pynbna ba ki ioh ticket UDP kaba la pynjah burom iaki nongialam ka party,” la ong u ma Pariat bad bynrap ba ka party ka don la ka por ba kan rai iaki kyrtong bad yn rai shuwa na primary unit jong ki constituency bapher bapher.

Ha kine 6-7 snem ki nongialam bad ki dkhot kila trei shitom met bad mynsiem ban pynkhlain iaka party, hynrei ki sniew bok ba ki duna MLA ka UDP bad kim lah ban poi sha ka thong wat haka MP elekshon kiba kynthup ia u Bah Paul Lyngdoh bad Jemino Mawthoh kila hap mad iaka jingrem. Hynrei ka party kam shym la duh jingkyrmen bad ka party kan khie rasong ha kane ka elekshon 2023.

U ma Finelyness Bareh MDC ka Rymbai uba long ruh u president UDP East Jaintia Hills District ula ong “Baroh ka dud ka ngap ha Jylla lah rah lut sha bar ne kiwei kiwei ki jylla bad kane ka jia long hadien bala kylla National Party ka NPP.”

“Kum ka National Party ban pynkhlain iaka party ia kaei kaba ioh na kane ka Jylla kala rah lut shawei bad ka Jylla pat kala kylla tyrkhong,” la ong u ma Finely bad kyntu iaki paidbah nongkyrshan UDP ba “kim dei ban shah pynbiej bad shah phon shah pah ne shah riam ha kiwei ki party namar ba ka UDP lada wan haka bor jait ba dei ka party trai ri ne regional party ka dud ka ngap kan neh kan sah ha kane hi ka jylla.”

Shuh shuh ula kitbok kitrwiang bad ai mynsiem iaki primary unit Jowai Constituency, ka constituency kaba don burom ba kin trei shitom ban poi sha ka thong.

U Ma Wining Garland Sungoh MDC Mowkaiaw uba long ruh u EM JHADC, ula kren halor u pud u sam ka Block I bad ula ong ba kum ki paidbah nongshong shnong kiba shi troh ba ka Jylla ka donkam ban synshar da ka party trai ri.

Ula ong haba iadei bad ka jingjia ha ka thain Ri Bhoi halor ka jingpynbeit pud ka daw ba mih ka klumar namar ba ka sorkar kam shym la kynthup lang iaki sordar, ki syiem bad ka KHADC ruh kam don iaka aiñ kaba khlain kumba don ka JHADC ban iada iaka khyndew ka shyiap. Ula ong ruh ba ka JHADC ka don iaka aiñ J.H.A.D (management and control over land and Assessment and collection of Revenue) Regulation, 1968 kaba la pynkylla bad pynbha khatduh iaka ha u snem 1985 (Third Amendment).

Ula ong ba lada ka sorkar ka iaid shakhmat ban pynbeit ia u pud ha Block I kam lah ban klet iaka JHADC bad kumta ban pynkhlain iaka aiñ khyndew shyiap ka donkam ruh ban jied na ki regional party ne ki party trai ri kiba lah ban iada iaka khyndew ka shyiap.

Kiwei kiwei kiba iadonlang ha kane ka jingialang pynskhem primary unit ki kynthup ia Myntri Sorkar bad uba long ruh u Youth President ka UDP u ma Kyrmen Shylla, MLA ma Nujorki Sungpoh, Advisor UDP bah Bindo Lanong, general secretary UDP Dr. Jemino Mawthoh, MLA barim jong ka Mawlai constituency u bah Embhah Syiemlieh, u Deputy Chief Executive Member ka JHADC u ma Lasky Rymbai, u Vice President ka UDP bah Allantry Dkhar bad kiwei kiwei. Iaka jingialang la pyniaid da u Kitbok Nongtdu president UDP Jowai Circle.