Ka Umden bad Mawphlang napdeng ki 36 tylli ki shnong kiba jop ha ka ‘Best Tourism Villages Competition 2024’

Syllad | The Rising MeghalayaSeptember 28, 2024

Ka Ministry of Tourism ha ka 27 tarik Nailur ka la pynbna ia ki 36 tylli ki shnong kum ki nongjop ha ka jingiakop ‘Best Tourism Villages Competition 2024,’ shibynta ka jingrakhe ia ka ‘World Tourism Day.’

Ka Shnong Umden bad Mawphlang ha Meghalaya ki dei napdeng kine ki shnong kiba la ioh ia ka jingithuh kum ki nongjop, kata ha ka thup Craft bad Heritage.

Ban kyntiew ia ki kam jngohkai pyrthei sha ki tyllong ne ki shnong hapoh ka ri India, la sdang ban pynlong ia ka ‘Best Tourism Villages Competition’ ha u snem 2023.

Ka jingphaikhmat ba kongsan ka long ban jied bad ai jingithuh i ki shnong kiba lah ban pynneh pynsah bad ban kyntiew ia ka kolshor bad ki jingdon jingem tynrai lyngba lyngba ka jinglong jingman ba la pynshong nongrim da ka imlang ka sahlang bad ka jingkut jingmut ban pynneh pynsah ha baroh ki bynta.

Ha ka jingiakop kaba la pynlong ha ka sien kaba nyngkong eh ha u 2023, la sakhi ia ka jingiashim bynta jong haduh 795 tylli ki shnong. Katba ha kane ka sien kaba ar jong kane ka jingiakop la ioh pdiang haduh 991 tylli ki shnong kiba aplai na ki 30 tylli ki Jylla bad ki Union Territories, ha kaba 36 tylli ki shnong ki la shah jied kum ki nongjop ha ki phra tylli ki kyrdan  jong ka jingkop kum ki shnong kiba kiba khring tam ia ki nongshangkai pyrthei.