Ka Uniform Civil Code (UCC) bad ka lawei jong ka Jaitbynriew Hynniewtrep

Robert June KharjahrinFebruary 12, 2020

Shikyntien halor ka kyntien ‘Uniform’. Kane ka kyntien ‘Uniform’ ka thew ia kaei kaei kaba ryntih, kano kano ka jingpynryntih ban long kawei ka rong, ban ia long kumjuh bad katjuh baroh salonsar. Ka Uniform Civil Code (UCC) ka mih na ka sainpyrkhat ban don ha ka ri: tang kawei ka ain (One nation, One law), tang kawei ka riti (One nation, One culture) bad tang kawei ka niam (One nation, One religion).

Lyngba ka Uniform Civil Code (UCC) yn wanrah ha salonsar baroh kawei ka ri India ia kajuh ka ain halor ki riti bad rukom pyniaid iing pyniaid sem (Personal Laws) kaba kynthup ia ki ain ne ki riti halor ka  shongkha shongman ( marriage ) , ka jingiapyllait san shyieng (Divorce) , ka tingkhun (Adoption), ka bai sumar lane baibam (Maintenance) bad ka jinghiar bad aipateng ne sambynta (Succession and inheritance).

Lyngba ka UCC, yn bujli bad pynduh pyndam noh ia baroh ki riti dustur jong ki jaitbynriew bad ki niam bapher bapher; ka lehniam lehrukom bad kumjuh ka rukom pyniaid ia kino kino ki kam jong kano kano ka  jaitbynriew katkum ba  la buh bad hikai da ki longshwa manshwa jong ki.

Kumba ka  long mynta,  ha baroh kawei ka ri India baiar, don bun spah bad bun hajar ki jaitbynriew bad jaitniam bapher bapher kiba don la ki jong ki jong ki rukom bad  riti dustur ia kiba la ithuh da ki ain ka sorkar India, ki sorkar jylla bad kumjuh ruh ki District Council bad ki bor synshar trai ri.

Ynda la pyntreikam ia ka UCC, kine baroh kin ym treikam shuh  naba yn treikam salonsar ha baroh kawei ka ri tang kawei ka ain, kata, ka UCC. Kan pynlko lut ia ki rong itynnad bapher bapher ba ka India ka don.

Lada ngin iaphai dien, nyngkong eh, dei ka party Congress kaba la thmu ban wanrah ia ka UCC ha ri India, hynrei hadien ki jingiathir bad jingiakren bun bun wat, bad haba iohi ia ka jingpyrshah na kiba bun ki liang, la pynsangeh shwa ia kata ka jingthmu bad shu buh noh tang kum ka ka Directive Principles of State Policy ia kiba la shu bthah ia ki jylla ka ri ban pyrshang bud khlem kano kano ka jingpynbor.

Ka BJP bad ka kmie jongka, ka RSS, kham hashwa ki la pyrshah jur ia ka UCC, hynrei hadien pat, ynda  haba ki ioh jingmut ba lyngba ka UCC ki lah pynban ban pynrung da ki rukom bad riti Hindu ha baroh kawei ka India, ki la kyrshan bad iakhun dohiap ban wanrah ia ka UCC ha ka ri India. Ha ka BJP bad RSS, ka UCC kam dei ka Secular Civil Code, hynrei kadei ka Uniform Hindu Code. Ha ka kyrteng ka UCC kin pyntreikam jubor ia ka Hindu Code ha baroh kawei ka Ri India bad hangta la kylla khongpong ki riti bad ki rukom bapher bapher jong ki jaitbynriew bad jaitniam ritpaid babun ha ka ri India baiar.

Ka National Law Commission ha u snem 2018 hadien ba ka la pynlong ia ka jingtwad jingmut paidbah na ki nongshongshnong  ka ri India ( Public Consultation) ka la ai jingmut ba ym dei ban pyntreikam ia ka UCC hynrei ban shu pynbha bad pynjlih ia ki ain bad ki riti ba la don lypa jong ki jaitbynriew bad jaitniam bapher bapher kiba don ha ri India.

Ka jaitbynriew Hynniewtrep jongngi ka don la ki jong ki riti dustur ba kyrpang halor ka shongkha shongman, ka kam iapyllait sanshyieng , ka hiar ne aipateng bad sambynta, ka tingkhun bad ka  rukom ai baibam baisumar khun. Ka niam Khristan ruh ka don la ki jong ki ain.

Ha ka sngi ba ka UCC ka treikam, baroh ki ain Khristan bad kumjuh ki jong ka jaitbynriew salonsar kin iap noh namar yn ym ithuh shuh iaki da kino kino ki bor, la ka long ki bor sorkar (Government Institutions) lane ki bor bishar (Judicial Institutions). Kan long ka jingduhnong kaba khraw haduh katta katta ia ka jaitbynriew namar kan duh noh iala ka snap kyrpang jongka , ki riti dustur bad rukom bapher bapher kiba don haka.

Ngi donkam namarkata ban pynpaw sha ka pyrthei ia ka jingpyrshah jur ka jongngi ia kane ka ain iakjakor ka ban sa pynbaji lut ia ka jingkyrpang jongngi kum ka jaitbynriew ritpaid kaba long tang i thngiat rit hakhmat ki duriaw ka pyrthei baiar.