Ka VPP ka party khlem ki agenda, u Pala ha ka longiing kaba pait ba pra, ong u Bah Prestone

Syllad | The Rising MeghalayaApril 12, 2024

U State President ka National People’s Party (NPP) uba dei ruh u Symbud Myntri Rangbah ka Jylla u Bah Prestone Tynsong u la ong ba ka liang pyrshah Voice of the People Party (VPP) hapoh ka jingialam jong u Bah Ardent Miller Basaiawmoit ka dei ka party kaba khlem kino kino ki mat ne ‘agenda’ bad u pynpaw ruh ka jingsngew synei na ka bynta u MP ka Congress u Bah Vincent H Pala namar u la sahkut hapoh ka longiing kaba pait ba pra.

Haba aijingkren ha ka jingialap ilekshon na ka bynta ka kyrtong MP ka NPP ka Kong Ampareen Lyngdoh ha Iawpynsin Wahiajer, West Jaintia Hills District ha ka 11 tarik Iaiong, u Bah Tynsong u la ong ba kane ka ilekshon MP kaba mynta ka la khihwin bha ha Ri Lum Khasi Jaintia namar jong ka party thymmai ka VPP.

“Ka VPP ba la ialam da u Bah Ardent Basaiawmoit ka la ialap ia ka ilekshon khlem ki mat ne agenda bad kane ka mat kaba ki leit sha u paidbah ka long tang ban kam ba ka dei tang ma ka, ka party kaba hok…hynrei kane ka jingkam ka jong ka kam shym la long kumba ka pynpaw,” u la ong.

“Ki la kynnoh ba baroh ki party sain pyrthei ki dei kiba pop. Ki isih ia u Modi, ki isih ia ka Sonia, ki isih ia u Bah Prestone bad ki isih ruh ia u Conrad Sangma namar ha ka jingsngew ka jong ki ka party kaba hok ka dei tang ka Prah. Hynrei, kaba sngewsih ka long ba tang 10 na ka 100 ngut ki briew kiba ngeit bad mynjur ia kane ka jingkam ka jong ki,” ong u Bah Prestone.

U Tynsong u la ther ruh ia ka VPP halor ka jingkynthoh ia ki nongialam niam da kaba ong ki donkti ha kaba sam kyiad ha ka por ilekshon bad ong, “Nga kwah ban kylli na ki nongialam niam kaei ka jingsngew ka jong ki ha kaba ki ieng halor kane?”

“Nga kwah ban kyntu ia ki paidbah ba lada phi sngew ba kaei kaei kaba ka VPP ka ong ka dei kaba bakla, phi don ia ka lad ban pynshisha ia kane ha ka 19 tarik mynta u bnai, bad kata ka long da kaba thep ia ka vote sha ka NPP,” u la bynrap. 

Nalor kata u la ong ruh ba ka long kaba sngewsih ba ki mat jong ka VPP ki la ktah jur ia ki samla bad kynthei tang namar ka kyntien ieid jaidbynriew.

“Ki la kam ba u Prah ula lah ruh ban wanrah biang ia u Kiang Nangbah bad u Tirot Sing, hynrei haba ngi pyrshang ban khmih bniah ngi shem ba ki (nongialam VPP) kim iahap khyndiat ruh bad u Kiang Nangbah ne bad u Tirot Sing jong ka jaidbynriew,” ong u Tynsong da kaba bynta, “Kane ka long namar ba lada ki ieid ia ka jaidbynriew, hato ka dei ban kren kynthoh kumtei ia ki kynthei briew? Hato ka long kaba dei ban ther ther ia ki kynthei? Ngan hap ban iehnoh ha phi ba phin ia jubab ia kine baroh.”

Haba phai sha ka party Congress, u Tynsong u la ong ba ma u ha ryngkat u Sniawbhalang Dhar lem bad kiwei pat ki la rai ban mih noh na ka Congress ha ka por ba ka dang khlain bha hapoh Meghalaya, kata namar ka dei ka longiing kaba pait ba pra.

“Ka dei ka longiing kaba pait ba pra. U kurim bad ka kurim ki iashoh iadat, kumjuh ruh ki shipara ki ialeh markynti hapdeng jong ki. Ka dang iai don ka jingiapait iapra kaba jur hapoh ka Congress ha Delhi. U Rahul Gandhi u iaid la ka jong ka lynti bad u president Kharge ha la ka jong ka lynti,” u la ong.

Da kaba pynpaw ba u Bah Pala u dei u briew uba bha, une u nongialam ka NPP watla katta u la ong, “Hynrei ka long kaba sngewsih ba u dang sahkut noh ha ka longiing kaba pait ba pra.”

U la ong ba ka NPP ka iatylli lang kawei. “Ngi la jied ia ka Kong Ampareen kum ka kyrtong jong ngi kum ka longiing. Ka la ioh ia ka jingkyrshan na ka longiing jong ka ym kumba long kiwei pat ki party kiba tang iwei arngut kiba shim ia ki rai halor kiba kum kine ki bynta,” u la ong.

Nalor kata u Tynsong u la ong, “Ngi ruh ngi dei ka party kaba buh shwa ia U Blei hakhmat bad ngim shym la wan hangne ban pynbiej ia ki paidbah hynrei ban kyrpad ia ki ba kin ai ka jingkyrshan bad ban ailad ia ka seng NPP.” Katkum ka jingpynpaw ka jong u, ka jingjop ia ka Shillong seat kan nangpynkhlain shuh shuh ia ka NPP.