Ka VPP kam don bynta ha kaba thung nongialam liang pyrshah: Kharpran

Syllad | The Rising MeghalayaJuly 29, 2024

Ka Voice of the People Party (VPP) ka pynshai ba ka rai jong u president rangbah jong ka party u Bah Ardent Miller Basaiawmoit ban ai ka jingkyrshan ia u MLA barim ka Gambegre u Saleng A Sangma kum u nongialam ka liang pyrshah ka dei kaba la leh ha ka bor  sngewthuh jong u shimet bad ym ka rai jong ka party.

Ha ka shithi ba la thoh sha u Lamphang ka Iingdorbar thawain ka Jylla u Thomas A Sangma haka 29 tarik Naitung, u Secretary ka VPP parliamentary party uba dei ruh u MLA ka Mawryngkneng u Bah Heavingstone Kharpran u la ong, “…Na ka bynta ka Voice of the People Party Nga kwah ban pynpaw ba ka party ka la shah pynklumar jingmut namar ki jingmih khubor ba khah khah lyngba ki lad pathai khubor, ha kaba la pynjah burom khlem nongrim ia ka kyrteng jong ka party ha kaba iadei bad ka jingthung ia u nongialam jong ka liang pyrshah.”

“Kumta, Nga kwah ban pynpaw shai ba ka party kam shym la don bynta tei ei ruh ha kaba iadei bad ka jingshim rai da ka ophis jong phi ban thung ia u nongialam ka liang pyrshah,” kata da kaba bynrap ba, “Ka jingkyrshan da u president ka party jong ngi u Bah Ardent Miller Basaiawmoit ia u Saleng A Sangma na ka bynta ka kam nongialam ka liang pyrshah ym dei ban shim halor ka jingdon bynta ha kaba thung ia u nongialam liang pyrshah namar ka dei ka jingleh ha ka bor ba shimet jong u da kaba pynshong nongrim halor ka jingkyrpad ba shimet jong u Saleng A Sangma ha kaba iadei bad kane ka bynta.”