Ka VPP kan pynkhlain ia ki District Council, ka Article 371 kan iada ia ka Meghalaya na ki ain ka Sorkar Pdeng: Ardent

Syllad | The Rising MeghalayaApril 16, 2024

U President jong ka  Voice of the People Party (VPP) u Bah Ardent Miller Basaiawmoit ha ka 15 tarik Iaiong, u la ong ba ka  National People’s Party (NPP) ka kwah ban pynkhlain ia ka Jaintia Hills Autonomous District Council (JHADC) da kaba pynduh ia ka tulop jong ki nongtrei mynta la buntylli ki bnai.

Haba aijingkren ha ka jingialap ilekshon ha Jowai, West Jaintia Hills District, u Bah Basaiawmoit u la ong ba ka VPP ka dawa na ka bynta ban pynreikam ia ka Article 371 na ka bynta ban aijingiada ia ka Meghalaya na ki aiñ ka Sorkar Pdeng kiba ktah ia ka bha ka miat jong ki jaidbynriew trai shnong riewlum.

U la kyntait ruh ba ka jingpyntreikam ia ka Article 371 kan lam sha ka jingpynduh pyndam ia ki District Council hapoh ka Jylla Meghalaya.

Kumta ruh u la ong ba ki jingkynnoh jong ka party NPP ba ka VPP ka pyrshang ban pynduh pyndam noh ia ki District Council kam long kaba shisha bad kaba ialam bakla.

 “Ka jingshisha hi ka long ba ngi kwah ban pynkhlain shuh shuh ia ki District Council,” ong une u nongialam ka VPP.