Ka VPP kan shah rem na ki constituency ki 4 ngut ki MLA ha kane ka elekshon MDC: Pyniaid

Syllad | The Rising MeghalayaFebruary 3, 2025

U Chief Executive Member (CEM) ka Khasi Hills Autonomous District Council (KHADC), u Bah Pyniaid Sing Syiem u la iathuh lypa ba ka Voice of the People Party (VPP) kan mad ia ka jingduh nong kaba jur khamtam na ki constituency jong ki saw ngut ki MLA jong ka ha kane ka elekshon MDC ka ban long ha ka 21 tarik Rymphang namar ki paidbah ki la ioh jingsneng.          

“Phin sa sakhi khamtam na ki constituency jong ki saw ngut ki MLA ka VPP kata na (Nongkrem, Mawlai, Mawryngkneng bad North Shillong) kan mad ia ka jingshah rem namar ki paidbah ki la ioh jingsneng. Hashwa ban jop ia ka elekshon ki la ai ia ki jingkular kiba heh hynrei hadien ba la shah jied ki la pulom ban pynurlong ia ki. Kumta, ruh khlem artatien bad ki paidbah kin ai ia ka jubab kaba biang ha kane ka elekshon ADC ka ban wan,” ong u Bah Pyniaid haba kren sha ki lad pathai khubor hadien ba la pyndep ia ka jingthep kyrteng hynne ka sngi 3 tarik Rymphang ha ISBT, Mawiong kum u kyrtong ka National People’s Party (NPP) na Nongthymmai constituency.              

Ia u Bah Pyniaid la synran lang da ki nongialam jong ka Confederation of the North East Councils kiba mihkhmat ia ki shiphew tylli ki Autonomous District Councils (ADC) jong ka thain Shatei Lammihngi kaba kynthup ia u Deputy Chief Executive Member (CEM) ka Bodoland Territorial Council, u Executive Member ka Karbi Anglong Autonomous Council (KAAC) Member ka Chakma District Council ka Mizoram bad kiwei kiwei nalor ki nongtrei bad ki nongkyrshan ka party.                

Katkum ka jingpynpaw ka jong u, u Bah Pyniaid u la ong ba ka jingktah jong ki rynsan social media ka la long kaba jur haduh katta katta ha kaba ki briew ki la shah ialam bakla ha ka elekshon ba la dep. “Hynrei mynta ki briew ki la ioh jingsneng bad kin ai ia ka jubab kaba biang,” u la ong.