Ka VPP kan ym poi shano shano ruh ha Meghalaya, ong u kyrtong ka RDA

Syllad | The Rising MeghalayaMarch 26, 2024

U kyrtong ka Regional Democratic Alliance (RDA) u Bah Robertjune Kharjahrin haka 26 tarik Lber, u la ong ba ka party liang pyrshah kaba thymmai ka Voice of the People Party (VPP) kan ym ioh satia ia ka jingjop ha kane ka Lok Sabha ilekshon ka ban wan na Shillong parliamentary seat.

U Kharjahrin u la wan ban thep kyrteng haka 26 tarik Lber ha ryngkat ka jingsynran lang u President ka UDP u Bah Metbah Lyngdoh kumjuh u President ka HSPDP u bah KP Pangniang nalor ki MLA, MDC, ki nongialam party bad nongtrei ka party na baroh arliang ka kynhun synrop.

Haba kren sha ki lad pathai khubor, u Bah Kharjahrin u la ong, “Ka RDA kan ym weng noh na ka jingiakhun hynrei kan trei shitom ban ioh ia ka jingjop ha kane ka ilekshon ka ban wan.”

“Lada phi phai kyllum sha ka jingioh vote ka UDP bad ka HSPDP ha u snem 2023 ngi sngew skhem bad ngin nang lah ban nangkyntiew shuh shuh nalor kane. Na kyrmen skhem ba ngin ioh ia ka jingjop ha kane ka ilekshon,” ula ong.

Da kaba pynpaw ba ka VPP kam long satia ka jingsyier na ka bynta ka RDA, u bah Kharjahrin u la ong, “Ka VPP ka dei ka party thymmai ka bym don ia ki nongtrei kiba na tynrai. Ka VPP kam don ki MLA bad ki MDC kumba ngi don. Ka VPP kan ym lah ban ioh ia ka jingjop namar ngi don ia ka kabu kaba kham biang ban jop haba ia nujor bad kiwei pat ki kyrtong.”

“Ngam kwah ban iatai bad une u briew (Ardent Basaiawmoit) hynrei Ngan shu pynkynmaw ia kaei kaba u la ong ha Mawkyrwat ha u snem 2018, kata ba ki party thymmai kin ym poi shano shano ruh, kumta ha kane ka kynti kaba mynta ruh kane ka party thymmai (VPP) kan ym poi shano shano ruh,” ong u kyrtong ka RDA.

Haba kdew halor ki mat jong ka RDA, u Kharjahrin u la ong ba kum ka kynhun synrop kan iakhuh na ka bynta ban pyntreikam mardor ia ka Inner Line Permit (ILP), bad kynthup ia ka Ktien Khasi ha ka khyrnit ba phra jong ka Riti synshar Ri, ban weng ia ki jingeh halor ki kam khappud hapdeng ka Assam bad ka Meghalaya bad ban bishar bniah biang ia ka mat kaba iadei bad u pud u sam hapdeng ka India bad ka Bangladesh.

Ha kaba iadei bad ki rukom treikam jong une u MP ba mynta, u Bah Kharjahrin u la ong ba un ieh ha ki paidbah ba kin bishar, hynrei ka la dei ka por ban bujli noh ia u Bah Pala uba la long u MP mynta lah 15 snem.

“Nga burom bha ia u (Pala). U dei u Riew Rangbah hynrei phi la iohi ba u khlem lah ban leh eiei than kumta nga sngew ba ka por kala dei ban bujli noh ia u. Nga thikna ba ki paidbah ka constituency kila ai biang eh ka por ia u ba un pyni kam bad ai ba ki paidbah kin bishar ia kane.

Shuh shuh ha kaba iadei bad ka rai jong ka BJP ban kyrsan ia ka NPP, une u kyrtong ka RDA u la ong, “Ngin iakren da kaba shai, kila iatreilang hapoh ka Parliament la bun snem, kila kyrshan lang ia ka CAB, kila ialeh lang ruh ia shibun ki kam kumta ngam lyngngoh satia kin iatreilang ha kane ka elekshon…ai ba u paidbah un bishar ia kane”.