La sdang iaka Website ban iarap nongdie nongthied ha Jylla | Pule ban tip khambniah

Syllad | The Rising MeghalayaJune 3, 2021

Ka jingwan ka khlam COVID-19 kala pynshong set iaki briew hapoh ïing da kaba khang iaki jingkhang, ki dukan, ki iew ki hat ryngkat ki lad ban leit trei leit ktah bad leit kamai kajih. Ha kum kane ka por ki paidbah kumjuh ki trai dukan, kiba khaïi pateng, kiba trei bylla kila donkam iaka rynsan ba ki paidbah kin tip shaphang ka rukom plie dukan, kino ba lait ban leit trei kum ki misteri, khap shñiuh, kiba trei ïing, kiba shna bording wat haduh ban tip ruh kino ba leh iaki Home Delivery nalor kiwei pat.

Dei halor kane ka nongrim la sdang ia ka Website kaba ai kyrteng Aifindz kaba lah ban shem da kaba leit ha www.aifindz.in bad lah ruh ban pyndonkam khlem jingsiew naka bynta ban tip shaphang ki dukan, ki Restaurant, ki Hotel, ki kali kamai, ki jingbam ba shet ha ïing, ki mar ba shna ha ïing, ki jaka sumar kum ki Clinic bad kiwei kiwei lah ban buh ha kane ka Website.

Kum ka nuksa, ki briew ba don dukan die mar mynta la pynbeit da ka sorkar bad ki dorbar shnong iaki por kumjuh ki sngi plie dukan da kaba buh iaka pali. Katba ha kane ka website pat da kaba Register hapoh ka Aifindz ki briew ba don dukan ki lah ban buh iaki jingtip shaphang ki dukan jong ki lada dei kiba don ha Shillong ne ha kino kino ki jaka jong ka jylla, ha kaba naka liang ki paidbah pat ki lah ban wad (Search) ia kino kino ki jait dukan ba plie ha Shillong lane ha kiwei pat ki jaka ha kano kano ka sngi da kaba leit ha ka Aifindz.
Sa kawei ka nuksa ba iadei bad ki Local Taxi kumjuh kiwei pat ki jait kali kamai ba kumba long mynta la buh da ka sngi ia kiba lah ban kamai, kumta ki trai kali ki lah ban buh jingtip shaphang ka kali ha kano ka sngi ba ki kamai, kumjuh ruh ki paidbah ki lah ban phone lada dei ba ki donkam kali kyrkieh.

Ia kito kiba shet jingbam ha ïing, kiba don Restaurant, kiba leh iaka Home Delivery ki lah ban buh jingtip haka Aifindz shaphang ki jait jingbam ba ki shet ne ki die ryngkat ki Phone Number khnang ba ki briew kin ioh ban thied.

Kane ka Website Aifindz kan iarap iaki paidbah kumjuh ki trai dukan ha kum kine ki por jong ka khlam kumjuh ha ki por ban dang wan, bad la pynshlur iaki paidbah ban shim kabu ia kane ka lad kaba lah ban iarap iaki khambha.

Naka bynta ban tip khambniah halor kumno ban Register kumjuh ruh ban leh iaka Business Listing, ki paidbah ki lah ban pule hapoh ka FAQs jong ka Website.

Watla ka Website ka dei haka ktien English ruh, hynrei ki paidbah ki lah ban thoh shaphang ki dukan, ki jait kamai kajih jong ki ha ki ktien Khasi, Pnar bad Garo katkum ka mon jong ki.