Ka workshop kumno ban die iaki ki mar ba pynmih na Jylla Meghalaya haka rynsan ‘Online’

Syllad | The Rising MeghalayaAugust 13, 2020

Kan dei ka sien kaba nyngkong eh la pynlong iaka jingai jinghikai ia ki nongthaw nongthaw bad ki nongmih iaki jingbam halor kumno ban die iaki tiar bad ki mar haka rynsan online na Rilum Jaintia.

Ia kane ka workshop ne ka jingai jinghikai halor ka jingdie online iaki nongseng kam lajong ne ka “Online Selling For Local Entrepreneurs” la pynlong da ka omechan.com ha ryngkat ka jingkyrshan ka Marketing Wire bad District Commerce & Industries Centre West Jaiñtia Hills District Jowai ha conference hall jong ka ophis District Commerce & Industries Centre West Jaiñtia Hills District Jowai haka sngi Balang.

La wan ban iashimbynta ki nongthaw nongthain, ki nongshna iaki mar bapher bapher bad ki nongpynmih iaki mar rep ba bunjait kynthup iaka umngap ban die iaki haka online.

U Russel Nongrum u trai jong ka omechan ula ong la pynlong ia kane ka workshop da ka jingiatrelang ka Marketing Wire bad u General Manager jong ka District Commerce & Industries Centre West Jaiñtia Hills District Jowai u Pearlet Toi hadien ba ki nongthain nongthaw kila iakynduh jingeh ban die iaki mar bym don iew don hat shuh naka jingkhang khyrdep (Lockdown) ban iakhun pyrshah iaka khlam COVID-19.

Ka jingsar ka khlam COVID-19 kam shym la pynduh jingkyrmen kumno ban iarap iaki briew kiba trei kam lajong ha sor bad nongkyndong kiba ieng hala ki kjat ban die iaki mar lyngba ka online.

Ka buit ban sdang ia kane ka online, kaba dei ka sien kaba nyngkong na Jaintia Hills kadei naka lockdown kaba la ktah iaka nongthaw nongthain bad ki nongpynmih mar. Ka Omechan kan iarap ban pyniaid iaki mar ban kyntiew iaka lad kamai kajih jong ki nongseng kam ha ki sor, khap sor bad nongkyndong,” la ong u Russel Nongrum.

“Ka Jaintia Hills kadei kaba lah ban pynmih shibun jait ki mar, hynrei khlem kano kano ka rynsan mynta ha kum kane ka por ka saw ka sain naka jingiakhun iaka khlam kan buh jingeh iaki nongsengkam namar ba khang ka iew ki hat bad ym don shuh ki prorkam exhibition bad ki trade fair,” la ong u ma Pearlet Toi bad ula kyntu iaki nongseng kam ban shim kabu iaka rynsan online kaba dep ban pynkhreh ka omechan ban die iaki tiar ki tar haka online.

U Ma Pearlet Toi ula ban jur iaki nongshna bad nongthain nongthaw iaki mar ban shim kabu ia kane ka rynsan ban myntoi bad ban biang ka kamai ka kajih.

U Ma HH Mohrmen, President ka SURE ula ai jingmut ban shna bha iaki mar kiba iaid iew bad ki mar bam ruh ba pynthikna ba ym dei ban khleh eiei bad ban pynneh iaka jinglong tynrai ki jingbam.

U Trai jong ka Marketing Wire u Badal Nyalang, ula batai pynshai shuh shuh ba mynta tang ha India naduh u snem 2014 haduh 2020 ki nongthied mar online kila kiew katba nangmih ki snem. Ula nujor ba ha u snem 2014 tang 54.1 million ki nongthied, hynrei ha u snem 2020 kala kiew syndon haduh 329.1 million ki nongthied online.

Ula ong “Lada kiwei ki lah ban die iaki mar online balei ngi ngim lah bad ngi dei ban sdang mynta ban pyni sha ka pyrthei iaki mar jong ngi khnang ba phi ki nongsengkam lajong phin ieng hala ki jong ki kjat.”

Ula pyni ruh iaki rukom sdang ban die iaki mar haka pyrda ha kaba kumno kin register ban sdang ban die online. Ka don ka menu Sell With Us ban thep iaki kyrteng bad ki bank details bad ki nongdie kin lah ban thep iaki dur ki dar jong ki mar ban sdang ban die online haka omechan.

Hadien bala kut ka jing jinghikai la ailad iaki nongseng kam ban iakren bad pylliew jingmut halor kane ka kam die online iaki mar.