Kadei ka kamram ki nongialam ka saiñ hima ban pyntreikam ïaka ILP: CoMSO

Robert June KharjahrinSeptember 22, 2019

Naka liang jong ngi kum ki sengbhalang ngi la pyndep la ka bynta bad ngi la shim ia lyngti ban kyrsiew thiah, ban ai jingmut bad ban iasnohktilang bad ki nongialam ka sain hima kumno ban iada ia ka jaidbynriew bad ka jylla na ka jingshah tyllep noh ha ki bar jylla bad ki mynder ri. Ka High level committee on Influx kaba la long chairman da u Bah Bindo M Lanong ka la ai jingmut ban pyntreikam ia ka ILP (Inner Line Permit) ha baroh kawei ka jylla ban iada ia ki jingma na ka jingrung kyrthep ki poiwir. Na ka liang J ka CoMSO ngi dawa ia kaei kaba ka committee ba ladon bynta da ki MLA na baroh ki party, ki riewstad kum ki IAS, ki nongiasaid aiñ, ki scholar, ki sengbhalang bad ki khlieh nongsynshar ki la ai jingmynjur ha u snem 2012.

Ngi la ai jingmut kumno ban tynsad ia ki bor ka Inner Line Permit ha ka MRSSA da kaba pynrung ia kine kyndon:

1. Ban nymshah shuh ia ki bar jylla bad bar ri ban rung sha ka jylla khlem jingbit ka sorkar.
2. U bar jylla ne bar ri u dei ban biang ki kot ki sla bad dei ban tip shai u wan leh aiu, ki kam aiu kin trei, haei un sah bad ym dei ban shah ba un sah palat 179 sngi ha ka jylla lada ai lad ba un sah.
3. Dei ban pynshitom da kaba set along ne dain kuna lada u pynkhein ia kine ki kyndon.

Ngi la aijingmut ruh kumno kin leh ban lait ka ktah ia ki tourist, ki transit passenger bad ia ka roi ka par ka jylla.

Ka bynta kaba saw kaba ngi la ai jingmut kalong ban pynkylla ia ka Land Transfer Act da kaba ym shah ia ki bym dei ki trai muluk (indigenous tribe) ban thied khyndew, ban pynlong ia ki district konsil kum kiwei na ki bor ban peit lang ia ka jingdie khyndew sha ki Non Tribal ne bar jylla bad kiwei.

Mynta ka dei sa kamram ki nongsynshar bad ki nongialam ka sainpyrthei ban pyndep la ka kamram bad ngi dawa na phi baroh ba phi dei ban shim jingkitkhieh ban iada ia la ka jaidbynriew bad ka jylla. Na ka liang Jong ngi ngin nang iai bud dien bad pynkynmaw ia phi halor kane bad ngi kyrmen phin shim ka jingkitkhieh ban iada ia ka jylla na ki jingma kaban mih na ka jingrung kyrthep ki poiwir.