Kaei ka Cyber Crime bad kumno ban ïada
Ka Cyber Crime ka dei ka kam thok kam shukor ki briew kiba pyntbit kyrpang ialade ban kamai thok lyngba ka kor computer bad ka internet da kaba riam iaki briew kiba lui lui bad kiba duna ka jingtip jingnang ban pyndonkam iaka juk internet, computer bad ka phone.
Kine ki briew kiba don ka jingthmu kaba sniew ki dei kiba tbit ban pyndonkam iaki kor ki bor lyngba ka internet bad ki tbit ruh ban pynsniew iaka kor computer naka bynta ka jingmyntoi jong ki.
Wat ki briew kiba la nang la stad ruh ki shah pynngop ha kine ki riewshimkabu kiba tbit ban phon ban pah iaki briew haki rukom bapher bapher. Kine ki riewsniew ki don bunjait bad mynta bala khlain ka social media kileh mynleh long paralok, ki shna iaki website thok ban ai kam ai jam bad kiwei kiwei ki lad bad ka thong hi ka jong ki kalong ban ioh kamai jem.
Ki don ki riew shimkabu kiba pan iaki jingtip halor ki bank account, ki leh mynleh ban kum ki nongtrei bank ban pan iaki jingtip ne ki number ko ATM card, ki phah ruh iaki email kiba ai buskit, ne donation bad kiwei kiwei bad leh mynleh ruh ban iarap haka koit ka khiah bad kular iaka pisa da ki phew phew lak.
Ki don ki link ba ki phah ban pynsniew iaka computer. Nalor kata wat iaka kam shongkha kim sang ban pynbiej ia u shynrang ne kynthei bad kiwei kiwei ki jait kam.
Ka tnad Pulit ha kylleng ka ri bad ka jylla kila kyntu iaki paidbah ba kim dei ban iathuh shapang jong ki ha ki briew kiba kim ithuh bad ban sam iaki password, ki number account ne ATM bad kiwei kiwei
Ka tnad Pulit jong ka West Jaintia District Executive Force ban iarap iaki paidbah pyndonkam iaka internet kala pynmih da ki lad jingiada ban lait na ki Cyber Crime.
La kyntu iaki paidbah ban adkar ha kane ka juk internet.
La ong ba ki paidbah ki dei ban pyndonkam da ki software kiba treikam (updated) bad pyndonkam ruh ia u Anti-Virus bad Firewall na ka bynta ka jingiada.
Pyndonkam da ki password kiba khlain bad phim dei ban ia iathuh ia ki password jong phi iano iano.
Kiar na ki websites ki bym long thikna lane kiba phi artatien bad long ki ba husiar shwa ban plie ia kio kino ki jingphah ba phi ioh langba ka email, SMS lane ki links.
Pyndonkam daki lad jingïada kiba bun kyrdan kiba tip kum ki Two-Factor lane Multi-Factor Authentication na ka bynta ki email, social media bad kiwei kiwei
Ïada ia ki jong ki jingtip shaphang jong phi kiba long kyrpang lane ki ba donkam bad long kiba adkar haba pyndonkam ia ki mobile phone.
Jingiarap Iyngba ka National Cyber Crime Reporting Portal
- Lada phi kum ngop ha ki jingshah thok (cyber fraud) lane kino kino ki jait cybercrime, phi lah ban phah ia ki jingujor jong phi lyngba ka “National Cyber Crime Reporting Portal” https://www.cybercrime.gov.in
- Na bynta ki jingiarap lane ki jingtip ba kham bniah shaphang kane ka portal, phone ha une u toll free numbar 155260 naduh ka por 9 baje mynstep haduh 6 baje janmiet (Monday to Saturday).
Facebook
Instagram
Youtube
Twitter
Leave a Reply