Kaei ka Model Code of Conduct | Pule kiei ki bym dei ban leh haka por election

Syllad | The Rising MeghalayaMarch 21, 2024

U Deputy Commissioner (Election), West Jaintia Hills u la pyntip ba ka Election Commission ka Ri India (ECI) ka lah pynbna ba ia ka Election yn pynlong ha ka 19 tarik u April 2024. Ia kane ka election, lah dep pynbna ha ka 16 tarik u March 2024 bad naduh kane ka sngi hi lah pyntrei kam mardor ia ka Model Code of Conduct. Ka Model Code of Conduct kan dang neh haduh ka 6 June hadien ba la dep pynbna ia ki nongjop ha kane ka election. Kumta, kine ki sngi ki long kiba donkam ia ngi baroh kum ki nongsynshar shnong kiba peit ia ka bha ka miat ka shnong ka thaw ban tip bha ia ki ain ki kanun bad ban long ruh kiba husiar.

la ka Model Code of Conduct la thaw da ka jingmynjur lang da ka ECI bad ki seng sain pyrthei ban pyntikna ba yn ym don kano kano ka jingioh myntoi shiliang jong kano kano ka seng lane ki kyrtong. Kumta, to ngin ia sngewthuh lang ha ka ban peit khmih bha ba ki kyndon jong ka Model Code of Conduct ki iaid beit iaid ryntih kumne harum:

• Yn ym don kano kano ka seng lane u kyrtong kiban leh kino kino ki kam lane kren ki ktien kiba lah ban pynmih ka jingiashun para briew ha ki bynta kiba iadei bad ka jingngeit, ka ktien ka thylliej lane kiban wanrah ka jing pyn ia pher jaitbynriew.

• Lada don kano kano ka jingkren pyrshah ia kano kano ka seng lane u kyrtong, ka dei ban thew ia ki kam kiba ki la trei lane ia ki polisi treikam jong ki. Kan ym don kano kano ka jingkren bein ia ki kam shimet lane ki kam pohing jong u briew. Shuh shuh, ym dei ban shu kynthoh lane pharep khlem da don ki sabut bad ki sakhi ba biang.

• Ym dei ban ialap election na ki rynsan ingmane ha kano kano ka por.

• Baroh ki seng bad ki kyrtong ki dei ban kiar na ka jingpynbam pisa, sam jingbam, sam kiad, lane ban byrngem byrsit iano iano.Ym dei banpynlong meeting hajan ki polling station lane ban dang kanbas election 48 kynta shwa ia ka kynta kaba la buh ban thep vote khatduh (close of poll). Ym bit ruh ia kano kano ka seng lane kyrtong ban pynbiang kali ia ki nongthep vote.

• Dei ban ia burom kylliang ia ka ing ka sem jong baroh bad ban kiar na kaba pynlong jingialang lane jingiakhih pyrshah iano iano ha ing ha sem Jongno jongno lada dei ha ing u/ka kyrtong lane ki briew.

• Ki seng bad ki kyrtong kin bthah ia ki nongkyrshan jong ki ba kim dei ban pyndonkam ia ki jaka, ki ing lane ki kynroh jong ki briew shimet khlem da ioh
  shwa ia ka jingbit na ki trai ban buh dur lane lama lane ki poster.

• Ki nongkyrshan jong ki seng bad ki kyrtong kin ia burom mar kylliang ia kiba
  ialeh pyrshah bad ban ym pynwit ia ki meeting lane procession jong kiba ialeh
  pyrshah.

• Ki jingialang baroh ki dei ban don shwa ia ka jingbit ba wan na ka ophis u DC
  lyngba u Assistant Returning Officer bad da kaba la tip lypa ia ki bor pulit. Ka
  jingpyndonkam ia ki kor pynsawa kan don tang hadien kaba lah ioh jingbit.

• Yn ym shah ia uno uno u khynnah ne khyllung ban pyndonkam haka jingialap bad shongshit election haki shnong ki thaw.

• Kan ym don kano kano ka jingialap election shwa ia ka 6 baje mynstep bad hadien ka 10 baje mynmiet.

• Lada don ki jingiaid procession jong ki ar seng kiba iapyrshah, kin iakut shwa khnang ban ym don ka jingwit uwei ia uwei. Kine ki procession ki lah ban don katno katno tylli ki kali ruh hynrei ki seng bad ki kyrtong kin hap ban pyni ia ka jinglut jingsep baroh.

• Yn ym don kano kano ka jingthang tyngshop pyrshah ia kino kino ki briew.

• Ki jingialap election, ki jingkanbas baroh kin kut 48 kynta shwa ia ka kynta kaba la buh ban thep vote khatduh (close of poll) ka ta ka long ar sngi shwa ka janmiet jong ka sngi thep vote.

• Ha ka sngi then vote, la ai lad ia u kvrtong ban pvndonkam tang lai tylli ki kali ha kaba leit peit polling station.

• Lada don ki minister kiba leit kanbas election, ki dei ban pyndonkam tang da ki kali shimet bad ym da ki kali ba ki ioh na ka sorkar.

• Kum ki shnong ki thaw ym lah ban khang iano iano ruh ban kanbas ia u kyrtong lane party hapoh kane ka por jong ka Model Code of Conduct.

• Ka office jong u District Election Officer bad ki Assistant Returning Officer kin buh ia ki Static Surveillance Team bad ki Flying Squad kiban iaid bad don ha ki shnong bapher bapher. Kine ki team ki kynthup ia u Magistrate bad ki pulit kiban trei kam lem bad ka jingrekod video. La kyrpad ia baroh ki shnong ban ai ia ka jingiatreilang kaba pura ia kine ki team.

Ia kine ki phang ka ECI ka lah buh ryntih ban iabud kyllum khlem da don ka jingpeit shiliang khmat iano iano. Kum ki nongshong shnong, ngi don ka kamram ban leh katba lah khnang ba baroh salonsar kin bud ia kine ki kyndon.

U DC u la pyntip bad la kyrpad ia ki paidbah ba lada don kino kino ki briew kiba pynkhein ia kine, dei ban ai khubor mar mar sha ki bor ka district bad ki pulit. Lane ban phone ia ka control Room ha une u No. 1950 bad 03652-295229 jong ka ophis DC lane da kaba ai jingtip ha ka cVIGIL app (kaba lah ban download na Play Store Lane Apple Store) bad ki bor kiba iadei kin leh ia kaba donkam.

U Deputy Commissioner, u la kyrpad ia ki nongpyniaid shnong, political parties bad kumjuh ruh na ki nongshong  shnong  ban iatreilang lang bad ki bor pyniaid jong ka District kumba juh long  ban ioh ia ka election kaba jop.