Kam don jingbamsap haka skim JJM, ong u Myntri

Syllad | The Rising MeghalayaFebruary 15, 2024

U Myntri Sorkar jylla ba dei khmih ïa ka tnad Public Health Engineering (PHE) u Marcuise N Marak u la ong ba ka jingpyntreikam ïa ka Jal Jeevan Mission (JJM) ha ka jylla Meghalaya ka long kaba lait na ka bamsap bampong ne kaba khuid ba suba.

Haba kren bad ki nongthoh khubor haka 14 tarik Rymphang, u Marak u la ong,“Kumba ju leh ka jingpyntreikam ïa ka JJM ka dei kaba lait na ka kam bamsap”.

Haba kyntait iaki jingkynnoh, u Myntri u la ong, “Phin sa ïoh ka bai um tang ynda ka kam ka lah urlong. Ki kynhun Third Party ki don ban ai iaka kaiphod ba ka JJM na ka bynta kano kano ka shnong ba la dep, ynda ka um ka la poi bad ki paidbah ki sdang ban ïoh um hadien kane ba yn sa phah ka bill ban siew bai um. Tang hadien ba la dep siew iaka bai um kan don haka jingkhien katkum ka rukom.”

U la ong ba ka Jylla ka la kynjoh sha ka 74.47% ka jingpyntreikam ïaka JJM da kaba pynioh um sha ki 4.85 lak ki thliew ïing briew.

 “Kaei ka jingwit jingthud jong ki (BJP), ngam tip ? Ka lah ban don jingeh khyndiat khynsoit namar ngi pyrshang ka jingpyntreikam na ka bynta ki hajar tylli ki longïing hapdeng kane ngi pyrshang katba lah ban pyndep ïa ka kam,” u la ong ruh “ka la don ka sien ba ka la don ka jingkynnoh ba ka don ka jingbamsap hynrei ha ka jingshisha pat kam long satia kumta, ka jingslem ban pyntrei ïa ka kam ka la jia namar ka jingdon ki jingeh  ha ka por ba sdang ban trei ïa ka kam. Ban sdang biang ban trei,  ka la shimpor khyndiat hynrei mar sien dep ban weng ki jingeh ka kam ka la ïaid shaid shaid. Kumta ka kdew ba kam shym la don kano kano ka jingduna ha ka rukom treikam na ka liang ka tnad ba dei khmih ne na ka liang ka sorkar.”

Ha kajuh ka por u la  ong ruh ba ki don ki katto katne ki jingpyntrei ïa ki kam ki la shimpor na ka daw ka jingslem ban ïoh iaka bording.

Shuh shuh u Marak u la ong ba ka sorkar kam shym la sahdien ban poi sha ka thong ha ka por ba la buh. “Ka la don ka jingbuh ka thong ban pyndep ïa ka kam hapoh u Kyllalyngkot hynrei baroh ki jylla kim shym la lah ban pyndep ha kane ka por ba la buh. Ngi ruh mynta ngi la kot sha ka 74.47% ka kam ba la dep bad kyrmen ba ngi lah ban pyndep baroh kiba dang sah haduh u bnai Lber lane ha u ïaïong. Ngi pyrshang katba lah na ka liang jongngi.  Ngi duriap ha kane ka liang” la ong u Myntri.

U la pyntip ruh ba ka jylla ka ïoh jingïarap pisa na ka sorkar pdeng lyngba ki skhim bapher bapher kynthup ruh ka Amrut bad ka NESID na ka bynta ki jaka sor.