Kam don jingmut ban iashimbynta haka jingjied election CEM JHADC, ong u nongialam ka VPP

Syllad | The Rising MeghalayaMarch 1, 2025

U nongialam kaliang pyrshah Voice of the People Party (VPP) u ma Andrew Awhai Shullai haba kren hadien ka jingjied Chief Executive Member (CEM) jong ka Jaintia Hills Autonomous District Council (JHADC) ula ong ba kam don jingmut iaki ban don bynta haka jingjied ia u CEM ka konsil namar ba kim kwah ban jied ia u.

“Ngim kwah ban jied ia u Thombor Shiwat ne ia u Madonbai Rymbai ban long kum ki CEM ka konsil bad dei namar ba ngi sngew ba kam don jingmut kumta ruh ngim shym la shimbynta haka elekshon jied CEM,“la ong u nongialam ka liang pyrshah.

Ha kaba iadei bad ka cross voting ne ka jingai vote tam sha u Chairman ba thymmai ka konsil, u Dr Sankey Shangpung, u Andrew Shullai u la pynpaw ia ka jinglynngoh halor ka jingioh tam ar vote da u MDC jong ka NPP bad ula pynshai ruh ba kam shym la don kano kano ka jingpynbeit ryntih ha ka party ba iano kidei ban jied ha ka elekshon Chairman bad ula kynnoh ruh da kaba ong lehse lah ban dei ba ki MDC jong ka Congress kiba jied ia u MDC jong ka NPP.

Ka Congress kala pynskhem ba ka 2 vote kaba tam sha u Chairman ka dei ka vote na ki MDC ka VPP.

Ha kane ka jingjied Chairman, ki don ar ngut kiba iakhun kynthup ia Dr Sankey (NPP), Rikut N Parien (Cong), pynban ka jingioh vote jong ki ka long ba ka NPP kaba don haka liang synshar kaba don 18 ngut kala ioh vote 20, ka Congress kaba don 3 ngut ki MDC kala ioh 6 vote bad ka NOTA 3.