Kam don ka jingbakla ban dawa pynkha ia ki Jylla kiba rit, ong u AL Hek

Syllad | The Rising MeghalayaApril 2, 2025

U nongilam ka BJP bad Myntri ka Sorkar Jylla u Bah AL Hek ha ka 2 tarik Iaiong u la ong ba kam don satia kano kano ka jingbakla ban dawa pynkha ia ki jylla kiba rit.

Haba kren sha ki lad pathai khubor, u Bah Hek u la ong, “Ki paid Garo ruh ki kwah ia ka Garoland bad ki Khasi ruh ia ka Khasiland, kumta kaei ka jingbakla ban pan ia ki Jylla kiba rit. Hato ka don kaba bakla ban pan ia ki jylla kiba rit? Kam don jingeh hangno hangno ruh.”

Ia kane u Bah Hek u la jubab haba kylli ha kaba iadei bad ka jingkren jong u (L) Purno Agitok Sangma ha kaba iadei bad ki jylla kiba rit.

Watla katta une u nongialam ka BJP u la kyntait ban kynthoh ei ei halor ka jingiakynad hapdeng u Myntri Rangbah barim ka Manipur u N Biren Sngh bad u Myntri Rangbah ka Jylla u Conrad K Sangma halor ka jinglong jingman hapoh Manipur.

U Biren Singh haba kynnoh ia u CM ka Meghalaya ba u la wan tuklar ia ka kam pohiing ha Manipur, u la thoh lyngba ka social media da kaba ong, “U (L) PA Sangma shisien u la ai jingmut ban phiah ia ka North East sha ki jylla kiba rit katkum ka jingdon jong ki jaidbynriew, kaba dei ka jingthmu kaba buh jingma ia ka jingiatylli jong ka ri. Mynta ka kynti ruh ngi la iohi ia kajuh ka jingpyrshang ban tuklar ia ki kam pohiing ka Manipur khnang ban pynpait pynpra ia ka jylla.”

“Ngam don ei ei ban kren halor ka jingiakynad hapdeng u A bad u B. Nga kwah ban khmih tang ha kaba iadei bad ka bha ka miat jong ki paidbah nongshong shnong bad ka Jylla Meghalaya,” ong u Bah Hek.

Haba kylli u Bah Hek u la ong ruh ba ka jingiakynad kam dei satia hapdeng ka BJP bad ka NPP.

“Kane kam dei satia hapdeng ka NPP bad ka BJP, hynrei ngam don ban ong ei ei halor kane ka jingiakynad hapdeng kine ki arngut ki briew,” u la bynrap.

Ther u CM ka Jylla ia u N Biren Singh ba kynnoh ia ka nongrim u PA Sangma halor ka jingjia ha Manipur