Kam don ka jingtyrwa ban kyntiew kyrdan ia ka Agriculture College ka Jylla sha ka University: Myntri Khynnah

Syllad | The Rising MeghalayaDecember 4, 2024

U Myntri Khynnah ka Ministry of Agriculture & Farmers Welfare ka Sorkar Pdeng u Bhagirath Choudhary ha ka 3 tarik Nohprah u la ong ba kam shym la don satia kano kano ka jingtyrwa ban kyntiew kyrdan ia ka College of Agriculture ha Jylla Meghalaya sha ka University.

Ia kane u la jubab ha ka unstarred question No .1195 ba la wanrah da u MP ka Shillong u Bah Ricky AJ Syngkon ha Parliament.

U Myntri u pyntip da kaba ong, “Na ka bynta ka scientific research bad ban kyntiew ia ka rep ka riang ha ka Jylla Meghalaya ka Sorkar ka la buh ia ka ICAR Research Complex for North Eastern Hills (NEH) Region, Umiam, 07 Krishi Vigyan Kendras (KVKs) bad 03 tylli ki College (i) College of Post Graduate Studies in Agricultural Sciences, Barapani (ii) College of Community Science, Tura (iii) College of Agriculture, Kyrdemkulai.”

Shwa kane u Choudhary u pyntip ba ki don laitylli ki Central Agricultural University, 4 tylli ki Indian Council of Agricultural Research (ICAR) kiba la biang ban long ki University bad 4 tylli ki Central University kiba aijinghikai halor ka rep ka riang, hynrei kam shym la don satia kano kano ka jingtyrwa ban kyntiew kyrdan ia kine ki College kiba la don lypa sha ka University kaba pura.

Namar ba ka kam rep bad ka jingpule halor ka rep ka riang ka dei ka sobjek jong ka jylla, ka sorkar Jylla ka lah ban kyntiew kyrdan lane ban plie ia la ka Agricultural University ba thymmai katkum ki jingdonkam ka jylla na ka bynta ban aijinghikai halor ka rep ka riang, ki jingwad bniah bad kiwei, u la ong.