Kam i por nynde wa ka juk thymme u pynman ka kur Passah ya ka Fete wa ar sngi ha Jowai

Syllad | The Rising MeghalayaJanuary 7, 2024

Ka Kur Passah, Jowai da pyntip ko wa daw pynman ko ya ka Fete ka Kur ha ka 12 wa 13 tarik uni u bnai ha Yungwalieh ka Dorbar Chnong, Chiliangraij, Jowai.

Ha kani ka Fete wa ar sngi daw em ki dhab tem na Jowai wa na Shillong kamjooh ki DJ ki wow pynka’it ya ki paidbah kamjooh leh daw em ki yalehke wa ki dukan dai baam wa har rukom kiwa dai nadooh ki baam Pnar hadooh ki baam khyllah.

Ha ka 12 tarik daw tem ka dhab Magnificent Obsession na Jowai wa u DJ Dony wei daw em leh ka Housie heiwa kawi ka Card chongdor ko T. 200 kawa wei ka House man ko T. 20,000 ka House wa nyngkong, T. 10,000 ka House wa ar, T. 5,000 ka House wa le wei ki Line kamjooh ki Corner wa ka Jolly Five won u man ki mar T. 1,000.

Ha ka 13 tarik nawon daw tem ka dhab Colours na Shillong kiwa ye phi leh u kyrpaad namo u Request ya ki wow tem ki ya i sur wa kwah phi u ap kam i por nynde (deiwa su poisa ya ka bai sur wow tem ki), wei daw em leh u DJ Ace wa ka Housie heiwa i dor kawi ka Card wei ka House man ko T. 400 kawa T. 50,000 ka House wa nyngkong, T. 30,000 ka House wa ar, T. 15,000 ka House wa le wei ki Line kamjooh ki Corner wa ka Jolly Five won u man ki mar T. 1,000.

Chooh chooh ha kani ka Fete daw em leh ka Khle Nasib kawa du 1,500 Ticket donhi heiwa kawi ka Card Congdor ko T. 200 kawi wei ki prize man ki kamni hawah:
1st Prize T. 60,000
2nd Prize T. 30,000
3rd Prize T. 10,000

Ya kani ka Fete u pynman khnang wow ye u pynmiat ya ka Tpep ka Kur kawa em ha Chuwakhu, Jowai.

Kamtæ neiliang ka Kur Passah da kyntu ko ya waroh ki lok ki jor, ki kha ki man kiwa najan najngai wow wan pynchongchit ya kani ka Fete ka Kur ha kitai ki ar sngi.

Ini toh katkam i pyntip na u President wa u Secretary ka Kur Passah, Jowai.