Kam ka Congress Mowkaiaw ba wan kyrshan bun ngut ki dkhot UDP

Syllad | The Rising MeghalayaFebruary 5, 2023

Ka 4-Mowkaiaw Congress Block Committee kala kam ba bun ngut ki nongkyrshan ka UDP na ka thain Shilliang Myntang bad Barato kila wan ban pyniasoh bad rai ban ai jingkyrshan ia u kyrtong Congress na Mowkaiaw u ma Nehemayah Tyngkan.

Ia kine ki nongkyrshan barim ka UDP la pdiang bad pynkup burom da u kyrtong ka Congress Nehemayah Tyngkan haka jingialang kaba long ha iing hall ka shnong Iooksi Iapkhla haka 4 tarik une u bnai.

Hakane ka sngi la ioh iaka jingkren na u Justice Paul Lyngdoh, u Ma Damki Suchiang Waheh Chnong Khatkasla, ka Esyndet Dkhar naka shnong Barato, u Ma C Tangliang Waheh Shnong Iooksi Iapkhla, bad na u Kyrtong ka Congress u Ma Nehemayah Tyngkan. Iaka jingialang la pyniaid da u Titos Shadap naka shnong Barato.

U Nehemayah haba kren ha kane ka jingialang ula ong ba kane ka dei ka sien kaba ar ba ula aireng haka elekshon MLA bad ula kyntu iaki paidbah kane ka thain ban ailad ia u khnang ba un ioh ka lad ban ai ka jingshakri ia u paidbah.

Ula kyntu ia baroh ki nongkyrshan jong u ba kim dei ngop bad shah pynbiej haka tyngka pliah bad ki dei ban skhem nongrim ban jied ia u nongmihkhmat.