Kam ka Dorbar Shnong Mowkaiaw ba dei u CM ba ai surok ym dei u MLA Nujorki Sungoh

Syllad | The Rising MeghalayaDecember 15, 2022

Ka Executive Committee ka Dorbar Shnong Mowkaiaw kaba la long ha ka 14^th December, 2022, da ka jingsngewkhia ka la pynrem jur ia ka jingkren jong u Ma Nujorki Sungoh, MLA ka 4 Mowkaiaw Constituency, ha kaba u la kam ba dei ma u uba la pynioh ia ka Scheme surok kaba 6 kilometre ha Mowkaiaw ia kaba u Chief Minister, Conrad K Sangma u la ai.

Kane ka jingkren jong u ka jia ha ka por ba u wan plie maw nongrim ia ki 2 tylli ki scheme central iingskul ha shnong Mowkaiaw ha ka 9^th December, 2022.

Kumta, ka Executive Committee jong ka Dorbar Shnong Mowkaiaw kala pynpaw ruh ia ka jingsngewsih bakhraw ia katei ka jingkren bym suidniew  jong u Ma Nujorki Sungoh ula pynbna paidbah ba la mang 6 klur ban pynioh surok na ka bynta ka surok hapoh shnong Mowkaiaw.

Ka Dorbar Shnong Mowkaiaw ka pynshai sha ki paidbah halor katei ka jingkren, ba ka long kaba bakla namar ba ia katei ka surok la dep pynbna lypa da u Chief Minister ha ka 22th August, 2022 ha ka jingpynskhem ia ki nongkitkam jong ka party NPP ha Mowkaiaw.

Kum ban shu kdew hangne, ia katei ka surok ba la mang da ka sorkar, dei lyngba ka jingud ka Executive Committee ha khmat u Chief Minister ka jylla jong ngi ha ka por ba u wan sha ka jingrakhe Golden Jubilee ka Sawlyngdoh Higher Secondary School Mowkaiaw ha u December, 2021. Bad ym tang katta, ka Executive Committee jong ka Dorbar Shnong ka la pyllut por ruh da kiba bun ki sngi bad ki bnai ban leit bud dien ia katei ka kam sha ka office jong u Chief Minister na ka por sha ka por ryngkat bad ka jingiarap u Ma Sniawbhalang Dhar, u Minister ka sorkar jylla, tad haduh ba la ioh iaka pisa ban mang ban shna iaka surok.

Kumta, ka jingioh jong ka shnong Mowkaiaw ia katei ka surok kaba 6 kilometre ka dei beit tang ka jingisynei u Chief Minister ia ka shnong Mowkaiaw lyngba u Ma Sniawbhalang Dhar uba la kyrshan borbah ia katei ka jingkyrpad rit jong ka Executive Dorbar Shnong.