Kam ka HNLC ba ther bom iaka Khliehriat Police Reserve, shah kem uwei

Syllad | The Rising MeghalayaJuly 14, 2021

Ka Hynniewtrep National Liberation Council (HNLC) ka shim ia ka jingkitkhlieh sa shisien ha ka jingdonkti ban pynbthei ia u bomb IED uba khia haduh 3-4 kilo ha Khliehriat Police Reserve, East Jaintia Hills.

Ka HNLC kala byrngem ruh ban pynbthei ha kharkhana dewbilat ha Star Cement, ka iing ki sem ki myntri bad MLA bad ki heh saipan ha Jylla.

Ka HNLC kala dawa naka sorkar pdeng ban shimkhia ban peit iaka jingeh kiba takhuh ka jylla bad lada ka phiel kan nang pynkhlain iaki kam pyntriem.

Kane ka jingjia ther bom improvised explosive device (IED) ha building ka police reserve Khliehriat kala jia haka por kumba 1:45 Am ha ka sngi Balang

“Kane ka seng kieng atiar kala kam baka donkti ban pynbthei ia une u bom IED ha Khliehriat,” la ong u general secretary cum publicity secretary ka HNLC u Sainkupar Nongtraw.

“Ka daw ba ka HNLC kala leh kane ka kam pyntriem ban kput kylla iaka tnad pulit kaba pyniap iaki dkhot ka HNLC. Ka HNLC kala ong ba u Tiewlong ula shah kem bad shah thang im ha ki pulit bad u Hepkhoit bad kiwei ki dkhot ka HNLC ruh kila pynshitom jur ha ki pulit shuwa ban pyniap iaki,” la kynnoh u Nongtraw.

U Nongtraw u ong ba ki pulit kilah ban kam ba kila jop iaka kam lehnoh ha rilum Garo, hynrei ka jingialeh bad ka HNLC kam dei katkum ka jingmutdur jong ki pulit bad ka HNLC kala ong ba ka lah ban leh kino kino ki kam pyntriem bad kane ka jingpynbthei ha Khliehriat Police Reserve ka HNLC ka kwah ban pyni ba ka lah ban leh ki kam pyntriem ha kino kino ki jaka kiba ka plan watla biang ki bor pahara.

Ka HNLC kala byrngem ruh ia ki katto katne ki riew shimet, ki heh saipan, MLA, Minster kiba pyndonkam bakla iaka bor jong ki bad ka HNLC kala ong ba lada ki sdang ban leh ki kam pyntriem, ki iing ki sem jong ki ruh kin kylla dpei.

“Ha kajuh ka por ka HNLC kala maham iaka Star Cement ba kam bit ban iaid shakhmat ha kaba iadei ban ka jingthmu ban tih mawshun ha Brishyrnot. “Lada ka Star Cement kam sangeh shisyndon, ngim don lad bad ngin sdang iaki kam pyntriem,” la ong u Nongtraw bad bynrap ruh ba kane ka dei ruh ka jingphah khubor sha ka Ministry of Home Affairs “lada u  Amit Shah, Union Home Minister, u leh bymsuidniew iaki jingdawa ba la dawa ba slem ka jaidbynriew Hynniewtrep, ka HNLC kan sdang iaki kam pyntriem jong ka.”

Ha kaba iade bad kane ka jingkam ka HNLC ia kane ka jingpynbthei bom, ka Pulit jong ka Khliehriat kila register iaka case katkum ka No 40 (07) 2021 U/s 120 B/ 121/ 121A IPC RW section 3 Explosive Substance Act R/w sections 10/13 UAP Act. Halor kane ka jingjia ka jingtohkit ki Pulit kala iaid shakhmat bad kila kem ruh ia uwei u suba hadlor kane ka jingjia.