Kam ka TMC ia ka shuki nongialam ka Liang pyrshah ha ka Iingdorbar thaw ain

Syllad | The Rising MeghalayaAugust 29, 2024

Ka liang pyrshah All India Trinamool Congress (AITC) ha ka 28 tarik Nailar ka la kam ban shimti ia ka shuki nongialam ka liang pyrshah hapoh ka iingdorbar thaw ain ka Jylla.

Haba kren sha ki lad pathai khubor, u Lamphang ka iingdorbar thaw ain u Thomas A Sangma u la ong, “U (Mukul Sangma) ha ka kyrdan shimet jong u um shym la kam. Kam long kumta. Ka TMC ka la kam na ka bynta kane ka kam nongialam liang pyrshah da ka jingkyrshan jong u MLA ba marwei ka Congress u Bah Ronnie V Lyngdoh.”

“Hooid, nga la ioh pdiang ia ka shithi jong ki (TMC) halor ka jingkam ban shimti ia katei ka kam nongialam liang pyrshah, hynrei nga dang bishar bniah ia ka bad shen ngan sa ai ia ka rai,” u la ong.

Haba kylli, u Lamphang u la ong, “Mynta baroh ki la don 6 ngut kaba long beit thik 10% na ka jingkhlain jong ka iingdorbar. Ki la pyndep ia kata ka kyndon hynrei da kiwei pat ki bynta, kumta nga dang ieh ia ka rai jong nga, bad shen ngan shim iaka rai ha kaba iadei bad kane ka bynta,” u la bynrap.

Halor ka kam kum u Chief Whip ka liang pyrshah, u Sangma u la ong, “Katkum ka jingkam jong ka TMC, namar ba ki ioh ia ka jingkyrshan na u MLA ba marwei ka Congress, ki la kyrpad ba ia ka kam nongialam Liang pyrshah dei ban ai sha ka TMC bad ia u Chief Whip ka liang pyrshah dei ban ai sha u Bah Ronnie V Lyngdoh.”

U nongialam jong ka Congress legislature party (CLP) bad MLA ka Mylliem u Bah Ronnie V Lyngdoh u la ong ba ka shuki nongialam liangpyrshah ka dei ka kam kaba kongsan bad ka TMC bad ka Congress ki la shim ia ka rai ban pynthikna ba katei ka kam dei satia ban sah thylli.

Haba kylli u Bah Ronnie u la ong ba ka don ka jingiasngewthuh jingmut lang hapdeng ki ar party.

“Namar ba ngi la ia wan lang, kin shimti ia ka kam nongialam liang pyrshah bad ka Congress kan shimti ia ka kam Chief Whip ka liang pyrshah.”

“Ngi la dep ban thoh sha u Lamphang bad mynta ka shong satang ha u Lamphang ba un pdiang ia kane ka jingtyrwa ka jong ngi,” u la bynrap.