Kam lah ban long ban shu map lut ia baroh ki kam bymman jong ka HNLC; ong u CM

Syllad | The Rising MeghalayaJune 28, 2024

U Myntri Rangbah ka jylla u Conrad K Sangma u la ong ba ki mat ne ishu kiba rit ba ria barabor ki dei kiba lah ban pynbeit, hynrei kan ym lah ban long pat ban shu map lut baroh (blanket amnesty) ia ka kynhun kieng atiar Hynniewtrep National Liberation Council (HNLC).

Haba kren sha ki lad pathai khubor ha ka 28 tarik Jylliew, u CM u la ong ba na ka liang ka sorkar Jylla ka la shimkhia ban iakren bad ka Sorkar Pdeng ha kaba iadei bad ki jingdawa jong ka Seng HNLC.

“Ngi la iakren bad ka Sorkar India bad ngi ka pynpaw shai ruh ba haduh kano ka kyrdan kaba ngi lah ban iaid bad ia kane ngi la aijingtip ruh sha ka HNLC bad ki dkhot la bunsien lyngba ka Sorkar Pdeng bad ka Sorkar Jylla. Kumta ki don katto katne ki kyndon ia kiba la bud beit ryntih ha baroh ki jingiakren ba la iadon bynta da ka Sorkar Pdeng, kumta ruh ngi la bud ia ki juh ki kyndon bad ki sienjam katkum ba dei ban leh,” ong u Conrad. Kumta kan ym lah ban long ban ong ban shu map lut ia baroh ki kam bymman, ngin hap ban bishar bniah katkum ki jinglong jingman jong ki jingjia ia kiba dei ban bishar bniah.

Watla katta u CM u la ong, “Ka Sorkar India bad ka Sorkar Jylla ki la pynpaw ba ki long kiba kloi ban iamir jingmut halor baroh kine kiei kiei baroh. Ban shu ai da ka jingthoh na ka bynta ban map ia baroh ki kam bymman kan long pyrshah na ka rukom treikam kaba la pyniaid shakhmat da ka Sorkar India bad Sorkar Jylla haba ngi pynlong ia ki jingiakren halor katei ka phang.”

Ha kaba sdang jong une u snem, ka HNLC ka la weng noh ia lade na ka jingiakren iasuk da kaba kynnoh ba ka sorkar ka la pulom ban shimkhia halor ki santylli ki mat jingdawa ba kongsan kaba kynthup halor ka jingmap noh ia baroh ki kam bymman kiba la leh da ki nongialam bad ki dkhot jong ka Seng.

Ha kaba iadei bad ka jingpynjur jong ka HNLC ia ki kam beain kum ki kam dawa pisa na ki nongshong shnong ka jylla, u Conrad u la ong, “Ki kam bymman ka mut ka jingphah da ki whatsapp message. Ngam tip ha kano ka rukom phin batai ia ka jingphah message lyngba ki whatsapp kum ka jingtreikam. Ka long kaba suk ha kine ki sngi ban phah ia ki whatsapp message -hynrei ngi dang wad ia ki lad ki lynti ban kem bad ngin lah ban leh ia kata. Ngi la iatreilang ryngkat bad ka tnat pulit, hynrei Ngam kwah ban kren palat halor kane ka bynta, hynrei halor kane ngi la ioh shuh shuh ia ki jingtip lyngba ki tnat syntiat bad ban rah tohkit ruh ia ki katto katne ki briew bad kane kan dang iai bteng.”

“Ngi la iakren ia kane ha ka jingialang hynne ka sngi bad Nga la bthah ia u DG lem bad kiwei ban pynkhlain bad pynleit jingmut bha halor kane ka phang khnang ban lah ban pynangeh ia kine ki kam dawa pisa naphang na ki nongshong shnong ka jylla,” u la ong.

Ha kaba iadei bad ka jingtreikam jong ki tnat ‘sleeper cell’ jong ka HNLC ia kaba la lah ban lapdien bad iohkem noh dang shen da ki pulit, u CM u la ong, “Ka kyntien ‘sleeper cell’ ka long kaba khlain bha, ka dei tang kawei pat ka kyntien na ka bynta kino kino ki bym ju treikam hynrei ba ki la shah kem ki shah kyntu ba kin long kiba treikam biang.

“Kam dei satia kita ki nongialam ha ka ‘sleeper cell’ hynrei ki shu dei ki riew shimet, kiba hateng ki la shu ioh ryngkhat ia ka pisa, bad la bthah ia ki ba kin leh ia kino kino ki kam bad ngi la shim ia ki ba ki dei kita ki ‘sleeper cell,” u la ong.

Shuh shuh u Conrad u la ong, “Ngi la lah ban pynkhlain bha ia ka Cyber Cell bad ngin pynthikna ba ngin mang shibynta ka jingpynlut na ka bynta kane. Kumta ngi dang bishar bniah halor kiei kie baroh bad kane ka dei ka daw ba ngi la lah ban kem ia ki katto katne ki riew shimet, hynrei ngim shym la shim sting satia.”