Kam long kaba suk ban pynskhem iaki 13000 ngut ki nonghikai SSA, ong u Myntri

Syllad | The Rising MeghalayaNovember 1, 2024

U Myntri ka Pule Puthi u Rakkam A Sangma haka 31 tarik u Risaw u ong ba ka jingkylli ban pynskhem pura ia ki nonghikai SSA kiba palat 13,000 ngut kam mih kumba long mynta namar ba ka sorkar ka dang wad lad ban pynjem ia kane ka jingeh.

Katkum ka jingong jong u Myntri, ka rai ka sorkar ban pynjynsur iaka rta haduh 45 snem na bynta ki nonghikai SSA ba kin ioh ban aplai rung kam nonghikai, ka long kawei na ki sienjam bala shim da ka sorkar ban weng iaka jingeh bad ban don ka jingshngain haka kam ki nonghikai.

Kane ka jingkren jong u Myntri kala wan long hadien ba ki nonghikai SSA hapoh ka lama jong ka Meghalaya SSA Schools Association (MSSASA) ki la dawa ban wanrah ia ka policy ban pynskhem iaka kam jong ki.

U Sangma u la ong ruh ba ka Meghalaya ka dei ka jylla kaba don bun eh ki nonghikai SSA kaba kot sha ka 13,000 haba ianujor bad kiwei ki jylla.

“Kumta, ym lah satia ban pynskhem mardor iaki nonghikai namar ba ka rukom treikam ha Meghalaya ka pher bak-ly-bak na kiwei pat ki ri. Ngi la seng ïa ki skul bad ki nonghikai SSA ba kyrpang lah slem bah,” u la ong .

“Kumta mynta khnang ban ailad ïa ki, mano mano ba dei hok, mano mano ba biang, ngi kwah ban ailad ïa ki ban apply ban rung kam katba nang mih ki kam kiba lait. Ngi la tyrwa ha ka kynhun myntri ban pynjlan ia ka rta khnang ba kin ioh ban aplai ha ka jingpynrung kam kaban sa wan. Katkum kane, ïa ka jingtyrwa la mynjur da ka kynhun myntri,” u la bynrap.

Ha kaba kylli, u myntri u la ong ba don kumba 600 tylli ki kam ba lait ha kine ki sngi.

“Ngin pynmih iaka advertisement shen. Kito kiba long qualified MTET ki lah ban aplai bad kin lah ban rung kam. Wat la ki don ha ka kam, hynrei ki dei ban pass MTET namar don ki kyndon bad ki rukom ba dei ban bud,” u la ong.

“Ka jingkylli ban pynrung ne pynskhem kam, kam lah ban mih hynrei ka jingeh kaba ki nonghikai SSA ki don ka dei namar ba ka tulop ka wan na ka sorkar India bad ka sorkar Meghalaya.”

“Lada ka sorkar ka rai mynta ka sngi, kan wanrah jingeh haka liang pisa tyngka ia ka jylla, kaba ym lah ban long. Khyndiat shisien. Ngi khmih lynti ba lada kam lah ban nym jia mynta hynrei ka lah ban jia lashai hynrei ka sorkar ka shimkhia bha. Ngi dang wad ia ki lad ki lynti bad ki lad ki lynti baroh bad ngi dang thaw ia ka formula kumno ban kyrshan bad kumno ban ai ia ki ia ka jingshngain ha ka kam namar ba bun na ki ki sngewkhia namar ba ka prokram SSA ha u snem 2026 kan sa kut noh bad thikna ba yn aiti noh sha ka sorkar jylla .  Ym don lad shuh ban mih. Kumta ka sorkar ka dang wad bniah bad kam iehnoh ïa u mawsiang ban weng ïa ki jingeh jong ki,” u la pynthikna.