Kam mih ka jingkylli ba ka Sorkar Jylla ka pynshlur ia ka kam tih dewiong beain; ong u Myntri

Syllad | The Rising MeghalayaFebruary 14, 2025

U Myntri ka  Sorkar Jylla u Marcuise N Marak ha ka 13 tarik Rymphang ula ong ba ka jingkylli kam mih satia ba ka Sorkar Jylla kan pynshlur ia ka kam tih dewiong beain bad kiwei kiwei pat ki kam beain hapoh ka Jylla.

“Kumno ka sorkar kan iatreilang na ka bynta kita ki kam beain. Hato phi tharai ka sorkar Jylla kan pynshlur ia kine ki kam beain? Ka jingtreikam ka sorkar MDA jong ngi kalong kaba shai bad khuid bad phi lah ban iohi ia ki sienjam ba la shim da u Myntri Rangbah ka Jylla u Conrad K Sangma, ka rukom kaba u la ialam ia ka jylla kaba phi lah ban iohi hi da lade,” u la ong.

“Kumta kim don satia kiba kum kine ki ban jia. Kino kino kiba iohi ia kiba kum kine bad lada ki dei ki jingshisha phi lah ban sei madan ban pyntip sha ka sorkar namar ngi don hangne ban khanglad ia kiba kum kine ki kam beain,” ong u Marak haba kren sha ki lad pathai khubor, kata haba jubab halor ki jingkynnoh jong ki party liang pyrshah ha kaba iadei bad ka interim report ba dang shen ba la aiti a u Justice (Retired) BP Katakey.

Haba kyntait ba ka don ka jingtih dewiong beain, une u Myntri u la ong, “Kam don satia kaba kum kane ka kam ha ka kynhun. Lada ka don, ka bor ka don ban kem ia ki bad nga tharai katto katne ki nongkhaii ki la dep ban ai ia ka jubab bad kane ka la leit sha ki bor District. Ngam tharai ba kan don ka kam tih dewiong beain ha South Garo Hills.”

Haba kylli, u Marak u la ong, “Hooid, ngam tip shaphang kata. Haduh mynta kito kiba don bynta ha ki kam tih dewiong baroh ki shong ki sah ha Williamnagar bad kiwei pat ki shnong, ngi lah ban iohi ia ki bad ki don ha ki jaka sor man ka por khlem da leh ei ei bad ba ma ki ruh ki dang ap ban ioh ia ka laisen na ka bynta ka jingtih dewiong kaba katkum ka juk stad ba mynta.”