Kam myntoi ban phah ia ki kyrtong jong kiwei ki party kum ki MP, ong u MLA ka South Shillong

Syllad | The Rising MeghalayaMarch 1, 2024

U MLA ka BJP na South Shillong u Sanbor Shullai haka 29 tarik Rymphang, u la ong ba kan ym don jingmyntoi ia ki nongshong shnong ka Khasi bad Jaintia bad kin phah ia ki kyrtong jong kiwei pat ki party sain hima kum ki dkhot ka parliament (MP) na Shillong seat namar ka BJP kan wanphai biang ha ka bor hapoh ka sorkar pdeng.

U la ong ruh ba ha ka jingsngew ka jong u ka por ka la dei eh ia ki nongthep vote hapoh Khasi bad Jaintia Hills bad kin ailad noh ia ka BJP na ka bynta san snem.

U Bah Sanbor u la kynnoh ba u MP ka Congress ba mynta na Shillong Seat u Bah Vincent H Pala u la shu pynlut por da kaba bam soh ot hapoh parliament namar ka jingbym wan ki kam pynroi sha ka jylla.

Haba kren sha ki lad pathai khubor, u Bah Shullai u la ong ruh  ba ki paidbah kin ai biang ka jingkyrshan ia ka BJP namar ki kam ba bha jong ka, kata la ka long ha ki kam pynroi bad ka jingwanrah ia ki skhim kaba la kyntiew shibun ia jinglong jingman jong ki longiing kiba duna ha ka ioh ka kot khamtam ha ki thain nongkyndong kumjuh ka jingpynioh ia ki skhim bapher bapher sha ki paid nongrep, ki longiing longsem bad kiwei pat ki bynta.

“Namar kata ka daw Nga kyrpad jur ia ki paid Khasi bad Jaintia bad kim dei ban pynlut kai ia ka por, kata ban ym phah ia ki kyrtong kiba dei na kiwei pat ki party sain hima lem kumta sa san snem biang ngin dang babe,” ong u Bah Sanbor.

Nalor kata, haba kyntu ia ki paidbah ba kin ailad ia ka BJP ha kane ka kynti kaba mynta, une u MLA ka BJP u la ong, “Lada phin phah da u MP ka BJP na Shillong, u lane ka kin ioh ban long Myntri bad ngin ioh shibun Bah ki kam pynroi   bad ngin ioh ruh ia ki skhim bapher bapher na ka bynta ban plielad ban ai kam ai jam sha ki samla jong ka thain Khasi bad Jaintia.

 Shuh shuh u la ong ruh ba ka Seng Congress ka la nang ngam arsut katba nang mih ki sngi ha kaba baroh ki nongialam.

Ka jingkren u bah Ronnie ka bym don nongrim:

U bah Sanbor Shullai, MLA ka South Shillong, ula ong ka long kaba bakla bad ka bym don nongrim halor ka jingkren u nongialam ka Congress Ronnie V Lyngdoh ba um ju kren bad um ju wan dorbar ka long kaba bakla

U bah Sanbor ula kyntu ia u bah Ronnie ban peit iaka prceeding ha iingdorbar shuwa ban kren. Ula ong ruh ba don ruh ha iing dorbar ha ka dorbar mang tyngka kaba dang shu kut shen

Ula pynkynmaw ruh ia une u nongialam ka Congress ba dei ma u ryngkat bad kiwei ki MLA kiba kren hapoh ka iing dorbar ha kaba iadei bad ka jingeh haka por ba sar ka khlam COVID-19 ban pynioh jingiarap iaki ba duk ba suk.

“Nga la kren ha iing dorbar bad Nga ai khublei ia u Chief Minister Conrad K Sangma ba mynjur ban pyllait mar T.50 lakh sha ki MLA ba kin lah ban kyrshan ia u paidbah da ki mar bam mar dih,” ula ong.

U Bah sanbor ula ong ba ym tang ba u kren ha iing dorbar, hynrei shabar bad u leit sha Delhi ban kren iaki ishu kum ka CAA, ILP bad ban pynrung iaka Ktien Khasi haka Eighth Schedule jong ka riti synshar ka ri.