Kam tei ïingmane ka Topcem, kyntu ka Balang Presbyterian Chiehruphi ban leh homework shuwa ban kren

Syllad | The Rising MeghalayaAugust 29, 2023

Ka Executive Committee jong ka Balang Presbyterian Chiehruphi haka sngi ba Ar, kala leit ban iakynduh iaki nongpyniaid ka Meghalaya Cement Limited (Topcem), Thangskai ban pan jingpynshai iaka jingkam jong uwei na ki nongtrei kane ka karkhana ka tei ruh iaka iing mane

Ia kane ka jingkam, une u heh ka Company, ula pynsngew lyngba ki lad pathai khubor hadien ka Public Hearing ne jingpynsngew paidbah kaba la long ha Community Hall ka karkhana haka 24 tarik une u bnai.

Haba pynshai sha ki nongialam Balang, u President ka Meghalaya Cement Limited Topcem u RK Pareek ula ong ba u heh ka karkhana u sngewthuh bakla bad um shym la mut satia iaki Balang jong ki lai Shnong hynrei u kren ia kawei ka iingmane kaba ka Topcem kala tei hapoh ka phyllaw jong ka karkhana na ka bynta ki nongtrei ki jong ka.

Hadien ba ki dkhot ka Balang ki la ioh iaka jingshai, ki la kren shai iaki heh ka Topcem ban bthah iaki nongtrei ki jong ki, ne ki nongkren (spoke person) kiba dei kren na bynta ka Company ka jong ki, ba kidei ban leh home work ne khmih bniah shwa ia la ki kot ki sla shwa ban wan put turoi ialade namar ka ktah iaka jingsngew jong kiwei.

U RK Pareek ula ong, “Lada don kano kano jingkren bakla da ki dkhot ne nongtrei jong nga kaba la pynmong ne pynsngewsih iano iano nga panmap halor kane ka bynta bad ka Company kam donkti eiei ban tei iaka iingmane jong phi”.

U Chairman ka Balang u Tymmenbasan RS Dhar haba kren shaki lad pathai khubor u pynpaw ba kila hun iaki jingpynshai jong ka company halor kane ka bynta.

Ha kane kajuh ka sngi ki nongialam jong ka Balang U Blei, Wahiajer ruh ki la leit ban iakynduh iaki heh ka Meghalaya Cement Limited, Topcem ban pan jingshai halor kane ka jingkam jong ka company ha kaban tei iingmane.