Kam trai ki trai jylla iaki dukan ki bar jylla ban lait shim trading laisen ki bar jylla: CEM

Syllad | The Rising MeghalayaNovember 8, 2024

U Chief Executive Member jong ka Jaintia Hills Autonomous District Council (JHADC) u Ma Thombor Shiwat u la kynthoh jur ia katto katne ngut ki nong Jaintia kiba ieng ban iada iaki bar jylla kiba khaii pateng ha Rilum Jaintia haba khynra trading laisen da kaba kam trai ia ki dukan jong ki bar jylla khnang ban lait shim trading laisen ki bar jylla.

U Ma Shiwat u la pynpaw ia kitei ki jingkynthoh haba jubab u ia ka motion bala wanrah da u MDC jong ka Jowai Central u Ma Andrew Shullai ha ka Dorbar Tlang jong ka JHADC kaba long haka 7 tarik Naiwieng.

U Chief Executive Member u la iathuh ba ki don ruh ki Waheh Shnong bad ki Sengbhalang ha Ri Lum Jaintia kiba khang ia ki bar jylla ban wan shim ia ki trading laisen na ka JHADC da kaba kular ia ki bar jylla ba kin bah ma ki lada wan khynra trading laisen ka JHADC.

U Chief Executive Member u la iathuh ba ka Executive Committee ka la thaw ia ka Revenue Augmentation Committee khnang ban thaw ia ki lad ki lynti ban pynmih pisa ia ka Council. U la kynthoh ruh ba haduh mynta tang shisien ruh um pat ioh satia kano kano ka kaiphot na ka Mobilisation Committee bala thaw da ka JHADC namar kim shym la shong jingialang satia wat tang shisien ruh.

Katba na ka liang jong u Deputy Chief Executive Member jong ka JHADC u Ma Lasky Rymbai u la iathuh ba ka Council ka la pynkiew ia ka bai NOC jong ki karkhana shna coke na ka 50 hajar tyngka sha ka 2 lak tyngka bad ka bai renewal sha ka Shi lak tyngka.

U la iathuh shuh shuh ba ka Council ka la pynkiew ia ka bai NOC ia ki karkhana shna cement na ka 5 lak tyngka sha ka 10 lak tyngka bad 5 lak tyngka bai renewal.

Ha kawei pat ka liang, ka Dorbar ka la pynpaw ia ka jingsngewlem halor ka jingkhlad noh jong u Chief Executive Member barim jong ka JHADC bad u Minister barim ka Sorkar Jylla u Ma H.B Dan bad u MDC barim ka Rymbai u Ma Welcome Dkhar haba ki dkhot baroh ki la pynlong ia ka jingsngap jar kaba shi minit bad la ioh ia ki kyntien sngewlem na u Ma Shiwat bad kiwei de ki MDC.