Kam u Sniawbhalang Dhar bala leh bha ka sorkar MDA iaka rilum Jaintia

Syllad | The Rising MeghalayaFebruary 4, 2023

Ka rilum Jaintia ka ïoh nong shibun bha na ka sorkar MDA haka jingïalam jong ka NPP kynthup naduh ka jingplie thymmai ïaki artylli ki Community & Rural Development Block, ki skhim shna surok thymmai kiba da ki spah klur, ki PHC bad sub centres kiba bun tylli kiba dang plie thymmai.

Ïa kane la ong u Ma Sñiawbhalang Working President jong ka NPP uba long u MLA jong ka Nartiang Constituency haba kren haka jingïalang paidbah jong ka NPP jong baroh 7 tylli ki Constituency ha rilum Jaintia ha madan Jrisalein Chutwakhu, Jowai haka sngi Thohdieng mynta ka taïew.

Ula ong ruh ba ïaka Umngot Water Supply Scheme (UWSS) kaba la shah ïeh teng ha u Dr R C Laloo la pyndep noh haka por u Wailadmiki Shylla kum u MLA bad la wanrah ruh ïaka skhim Smart Town bad Mini Secretariat ha Nongbah Jowai nalor ka jingshna thymmai ïaka Jowai By Pass kaba mih sha thaiñ Amlarem kaba 93 klur tyngka.

U Sñiawbhalang ula ong ba u Dr Laloo u la wanrah ïaka Jowai Municipal Board (JMB) haka por ka jinglong MLA jong u hynrei u Dr. Laloo ula shu ïeh khunswet noh ïa katei ka JMB hynrei ma u bad u Wailadmiki kin dang ïaleh kumno ban pynkhie im biang ïaka JMB.

Haba phai sha ka jingeh na ka daw ka jingbymdon ka jaka theh ñiut, u MLA ka Nartiang ula byrthen tyngeh da kaba ong ba ki don ki briew kiba leh politic da ka jhep (ka ñiut).

U Ma Sñiawbhalang ula pynkynmaw ïaki paidbah ïaka khlam Corona haba u Chief Minister ka jylla u Conrad K Sangma bad u Deputy Chief Minister ka jylla u Bah Prestone Tynsong ki la duh thiah duh dem ban pynbit pynbiang ïaki lad jingïada na katei ka khlam ïaki nongshong shnong jong ka Jylla.

Ula ong ruh ba ka sorkar Jylla ka la pynlut pisa ban pynpoi biang ïaki nongshong shnong jong ka jylla kiba sahkut shabar ka jylla ha katei ka por khlam Corona.

U Bah Sñiawbhalang ula pynshai paidbah ba ma u, u Conrad Sangma bad u Prestone Tynsong kiba long ki nongïalam kiba hakhmat duh jong ka party ki don kawei ka sur kawei ka jingmut kata ban trei bad ban shakri ïaki paidbah bad kam don kano kano ka team A ka team B bad ka team C kumba long kiwei ki party.

U Bah Dhar ula kop ruh ba ka NPP kan jop ha baroh 7 tylli ki Constituency ha rilum Jaintia bad lada jop baroh ki 7 tylli ki Constituency da ki kyrtong jong ka NPP kan plie lad plie lynti ïaka roi ka par ha rilum Jaintia namar da kawei ka sur bad kawei ka jingmut.