Kan long kaba sngewtynnad shibun lada u Bah Hek un dei u kyrtong election Lok Sabha: Kharkrang

Syllad | The Rising MeghalayaDecember 2, 2023

“Kan long kaba sngewtynnad shibun lada u MLA uba la jop haduh hynriew samoi kynthih na Pynthorumkhrah uba dei ruh u Myntri sorkar u Bah Alexander Laloo Hek un long u kyrtong napoh Shillong Parliamentary Constituency ha kane ka election MP Lok Sabha 2024,” ong u nongaiktien ka BJP Bah M Kharkrang.

Haba kren sha ki lad pathai khubor haka sngi Thohdieng, u Bah Kharkrang u la ong; “Lada ngi lah ban ioh ia u Bah AL Hek kum u kyrtong kan long kaba sngewtynnad palat”.

Une u heh Pulit IPS ba la shongthait watla katta u la ong ba ki nongialam ka party napoh Delhi kim pat shym la pan satia ia kano kano ka jingtyrwa ha kaba iadei bad kane ka phang, kumta ruh kam pat shym la don ka kyrtong jongno jongno ruh kaba la poi sha ki heh ha Delhi, u la ong.

Dang shen u Bah Hek haba  haba jubab ia ka jingkylli ula ong, “Ka shong ha ki nongialam ka party ha Delhi ban shim ia ka rai mano ban mih iakhun ha kane ka election.” Ula pynpaw ruh ba ki don lai ngut ki kyrtong kiba kwah ia ka ticket na Shillong.

Nalor kata haba jubab ia ka jingkylli, u Bah Kharkrang ula ong “Kam dei satia kaei kaei kaba sngewkmen ha kaba iadei bad ka jingpynieng kyrtong, hynrei kaba donkam hi ka long ba ngin hap peit la ngi don ne em u kyrtong uba biang”.

“Ngin jin da la sngewtynnad eh ban ioh da ka kyrtong kynthei kaba biang. Ngim pat khang ia ka jingkhang jong ngi, ngi dang plie ia baroh” ula ong.

Shuh shuh une u nongaiktien ka BJP ula ong ba ka Party kam don satia kano kano ka jingangnud ban iatreilang bad kino kino ki seng sain pyrthei hashuwa ka election Lok Sabha. Katkum ka jingong jong u, ka BJP ka ju iakhun marwei hi ha ki ilekshon.